विजय पौडेलको निधनमा नेकपा संयुक्तले तीन दिन झण्डा आधा झुकाउने

काठमाडौं । डा. विजय पौडेलको निधनमा घनश्याम भुसाल नेतृत्वको नेपाल कम्युनिस्ट पार्टी (संयुक्त) ले तीन दिनसम्म पार्टीको झण्डा आधा झुकाउने निर्णय गरेको छ ।

Watch On

मंगलबार बसेको पार्टीको केन्द्रीय कमिटीको आकस्मिक बैठकले पौडेलको सम्मानमा तीन दिन झण्डा आधा झुकाउने निर्णय गरेको हो ।

पार्टीका कार्यवाहक अध्यक्ष घनश्याम भुसालले जारी गरेको शोक प्रस्तावमा पौडेललाई पार्टीका प्रमुख नेता तथा सङ्गठन विभाग प्रमुखका रूपमा उल्लेख गरिएको छ ।

२०२१ साल चैत १ गते अर्घाखाँचीको खिदिममा जन्मिएका पौडेल १४–१५ वर्षको उमेरदेखि विद्यार्थी आन्दोलनमार्फत राजनीतिमा सक्रिय भएका थिए ।

उनले २०४४ सालमा तत्कालीन नेकपा मालेको जिल्ला सदस्यबाट राजनीतिक जिम्मेवारी सम्हाल्न थालेका थिए । २०५० सालमा नेकपा एमाले रुपन्देही जिल्ला कमिटीको उपसचिव बनेका उनी २०५३ मा सचिव भएका थिए । २०६५ मा एमालेको केन्द्रीय सदस्य र २०७१ मा पोलिटब्युरो सदस्य बनेका पौडेल २०७८ मा नेकपा एकीकृत समाजवादीको उपमहासचिव भएका थिए । पछिल्लो समय उनी नेकपा संयुक्तको सङ्गठन विभाग प्रमुख थिए ।

पौडेल कम्युनिस्ट नेता तथा जनवादी सांस्कृतिक आन्दोलनका अगुवा मोदनाथ प्रश्रित र सामाजिक तथा महिला जागरणकी अभियन्ता कविता पौडेलका जेठा छोरा हुन् ।

पार्टीले पौडेलप्रति श्रद्धाञ्जली अर्पण गर्दै उनका बुबा, आमा, छोराछोरी, बुहारी र आफन्तजनमा समवेदना व्यक्त गरेको छ ।