सार्वजनिक सवारीसाधनका चालकलाई यातायात व्यवस्था विभागको यस्तो निर्देशन

काठमाडौं। सार्वजनिक यात्रुवाहक सवारीसाधनका चालकलाई यात्रुका लागि खाजा, नास्ता र खाना खुवाउन स्वच्छ तथा गुणस्तरीय खाद्य पदार्थ उपलब्ध गराउने होटल तथा रेस्टुरेन्टमा मात्र सवारी रोक्न निर्देशन दिइएको छ।

Watch On

पूर्वाधार विकास मन्त्रालयअन्तर्गतको यातायात व्यवस्था विभागले २०७३ असोज २७ मा जारी गरेको सूचनामा खाद्य प्रविधि तथा गुण नियन्त्रण विभागको खाद्य स्वच्छता स्टिकर टाँसिएका होटल तथा रेस्टुरेन्टलाई सम्भव भएसम्म प्राथमिकता दिन भनिएको छ।

सार्वजनिक सवारीमा यात्रा गर्ने यात्रुलाई खाना खुवाउन रोक्ने होटल तथा रेस्टुरेन्टमा सरसफाइको कमी, बासी खाना, झिँगा भन्केका र न्यून गुणस्तरका खाद्य पदार्थ उपलब्ध गराउने तथा अत्यधिक मूल्य लिने गरेको भन्दै जनगुनासो आएपछि यस्तो निर्देशन दिइएको विभागले जनाएको छ।

विभागले होटल तथा रेस्टुरेन्टले उपलब्ध गराउने खाजा, नास्ता र खानाको गुणस्तरका कारण यात्रु बिरामी परेको गुनासोबारे सम्बन्धित निकायले सूक्ष्म निगरानी गरिरहेको जनाएको छ। त्यस्ता होटल तथा रेस्टुरेन्टमा खाएको खानाका कारण यात्रु बिरामी भएको पाइएमा सम्बन्धित सवारीचालक र होटल सञ्चालकलाई प्रचलित कानुनबमोजिम कडा कारबाही गरिने सूचनामा उल्लेख छ।

त्यस्तै, होटल तथा रेस्टुरेन्टमा खाद्य पदार्थको स्वच्छता र गुणस्तरमा कमी पाइएमा वा मूल्यमा ठगी भएमा नेपाल प्रहरीको हेल्पलाइन नम्बर १०० मा फोन गर्न विभागले यात्रुलाई अनुरोध गरेको छ।

यात्रुले सम्बन्धित जिल्ला प्रशासन कार्यालय, जिल्ला प्रहरी कार्यालय, जिल्ला ट्राफिक प्रहरी कार्यालय, खाद्य प्रविधि तथा गुण नियन्त्रण विभाग वा त्यसअन्तर्गतका नजिकका कार्यालयमा समेत उजुरी दिन सक्ने सूचनामा उल्लेख छ।

विभागले जारी गरेको सूचनामा सार्वजनिक यात्रुवाहक सवारीका चालक, होटल तथा रेस्टुरेन्ट व्यवसायी र यात्रुलाई निर्देशनको पालना गर्न आग्रह गरिएको छ।