बर्दियामा धमाधम फेला पर्दै अवैध हतियार, चारवटा बरामद

बर्दिया । चाडपर्व नजिकिँदै गर्दा बर्दियामा बेवारिसे अवस्थामा अवैध हतियार फेला पर्ने क्रम बढेको छ। चालु आर्थिक वर्षको साउनदेखि हालसम्म जिल्लाका विभिन्न स्थानबाट चारवटा बेवारिसे हतियार फेला परेको जिल्ला प्रहरी कार्यालयले जनाएको छ।

Watch On

पछिल्लोपटक ठाकुरबाबा नगरपालिका–३ गोदानास्थित कोपिला सामुदायिक वनमा मङ्गलबार खिया लागेको कटुवा पेस्तोल फेला परेको छ। स्थानीयको सूचनाका आधारमा इलाका प्रहरी कार्यालय बगनाहाको टोलीले वनको जङ्गलबाट कालो रङको पेस्तोल बरामद गरेको जिल्ला प्रहरी कार्यालयका प्रहरी निरीक्षक टेकबहादुर देउवाले जानकारी दिए।

उनका अनुसार बरामद पेस्तोल कानुनी प्रक्रिया पूरा गरी आवश्यक अनुसन्धानका लागि इलाका प्रहरी कार्यालय बगनाहामा सुरक्षित राखिएको छ।

यसअघि गत साउन २२ गते बढैयाताल गाउँपालिका–७ कर्णालीपुरस्थित सडकछेउको झाडीबाट कटुवा पेस्तोल फेला परेको थियो। त्यस्तै, भदौ २४ गते बढैयाताल गाउँपालिका–२ स्थित सिर्जनशील सामुदायिक वनमा बन्दुकमा प्रयोग हुने एक थान नालसहित भरुवा बन्दुक फेला परेको थियो। भदौ २५ गते गेरुवा गाउँपालिका–२ बालुवातार जाने सडकछेउको झाडीबाट पनि कटुवा पेस्तोल बरामद भएको प्रहरीले जनाएको छ।

यसअघि गत जेठ २४ गते पनि कोपिला सामुदायिक वनमा बेवारिसे अवस्थामा भरुवा बन्दुक फेला परेको थियो। दाउरा खोज्न गएका स्थानीय महिलाले बन्दुक देखेपछि प्रहरीलाई खबर गरेका थिए।

जिल्ला प्रहरी कार्यालयका प्रहरी उपरीक्षक सरोज पौडेलले गत वैशाखदेखि अवैध हतियार नियन्त्रणका लागि ‘स्विप अपरेसन’ सञ्चालन गरिएकाले बेवारिसे अवस्थामा हतियार फेला पर्ने क्रम बढेको बताए। उनका अनुसार अभियानले चाडपर्वका बेला हुन सक्ने सुरक्षा चुनौती न्यूनीकरण गर्न सहयोग पुग्नेछ।

भारतसँग सीमा जोडिएको बर्दियाका सामुदायिक वन क्षेत्रमा चोरीसिकारी हुने गरेको छ। त्यसलाई मध्यनजर गर्दै प्रहरीले वन क्षेत्रमा निगरानी बढाएको प्रहरी उपरीक्षक पौडेलले बताए।

प्रहरीको निगरानी बढेपछि अवैध हतियार राख्नेहरूलाई समस्या परेको हुन सक्ने र हतियार लुकाउने क्रममा ती बेवारिसे अवस्थामा फेला परेको हुन सक्ने उनको भनाइ छ।

जिल्लामा अझै अवैध हतियार हुन सक्ने अनुमान गर्दै प्रहरीले नियन्त्रण अभियानलाई तीव्रता दिएको छ। चाडपर्वका बेला हुन सक्ने सम्भावित सुरक्षा चुनौती कम गर्न अभियानलाई निरन्तरता दिइएको पौडेलले बताए।