यी हुन् आज अवरुद्ध भएका मुख्य सडकहरु

काठमाडौँ । लगातारको प्रतिकूल मौसम, हिमपहिरो र वर्षाका कारण गण्डकी प्रदेशका विभिन्न राजमार्गहरूमा बाढी तथा पहिरो जाँदा सवारी आवागमन प्रभावित बनेको छ। 

Watch On

नेपाल प्रहरीले सार्वजनिक गरेको विवरणअनुसार गोरखा जिल्लामा बाढीले पुलहरू बगाएपछि सडक पूर्ण रूपमा अवरुद्ध भएको छ भने म्याग्दी र नवलपरासी पूर्वमा पहिरो पन्छाएर सडक एकतर्फी सुचारु गरिएको छ।

गोरखा: हिमपहिरोपछि आएको बाढीले पुलहरू बगाउँदा सडक पूर्ण अवरुद्ध
असोज २५ गते बिहान ०५:३० बजे चुमनुब्रि गाउँपालिका-६ स्थित सिरिङ्गे हिमालमा हिमपहिरो जाँदा स्थानीय उइनगुलुङ खोला केही समय थुनिन पुगेको थियो। खोला फुटेपछि बुढीगण्डकी नदीमा आएको भिषण बाढीले आरुघाट गाउँपालिका-२ र ३ जोड्ने सोतीस्थित फलामे मोटरेबल पक्की पुल तथा वडा नं. ९ स्थित आरुघाटबाट धादिङ जोड्ने पक्की पुल (नयाँपुल) बगाएको छ।

पुल बगाएपछि गोरखा-धादिङ जोड्ने यो सडक खण्डमा यातातयात सेवा पूर्ण रूपमा अवरुद्ध भएको छ।   

गोरखातर्फको यात्रा गर्ने यात्रुहरूलाई बाटो पूर्ण रूपमा बन्द रहेकाले वैकल्पिक मार्ग प्रयोग गर्न वा स्थिति सहज नभएसम्म यात्रा स्थगित गर्न अनुरोध गरिएको छ। कालीगण्डकी करिडोर र बेनी-जोमसोम खण्डमा यात्रा गर्दा संयमता अपनाउन प्रहरीले आग्रह गरेको छ।

नवलपरासी (पूर्व): कालीगण्डकी करिडोरमा एकतर्फी मात्र गाडी सञ्चालन
बौदीकाली गाउँपालिका-०३ स्थित जन्ती पहिरोमा असोज २४ गते अपराह्न १६:४५ बजे पहिरो जाँदा कालीगण्डकी करिडोर अवरुद्ध भएको थियो। हाल पहिरो पन्छाएर बाटो एकतर्फी सुचारु गरिए पनि ठूला सवारी साधनहरू भने सञ्चालन हुन नसकेको प्रहरीले जनाएको छ।

म्याग्दी: बेनी-जोमसोम सडक खण्ड एकतर्फी सुचारु
म्याग्दीको रघुगंगा गाउँपालिका-०२ बैसरीमा असोज २० गते बिहान ०५:५० बजे गएको पहिरोका कारण बेनी-जोमसोम सडक खण्ड अवरुद्ध भएको थियो। हाल उक्त स्थानमा पहिरो हटाई सडक एकतर्फी रूपमा सुचारु गरिएको छ।