कोरला नाकाबाट भित्रिएका २ हजार ५०० भन्दा बढी इभी रोकिए मुस्ताङमै

मुस्ताङ । बाढीपहिरोले बेनी–जोमसोम सडक अवरुद्ध भएपछि चीनको कोरलानाकाबाट नेपाल भित्रिएका दुई हजार ५०० भन्दा बढी विद्युतीय सवारीसाधन (इभी) मुस्ताङमै रोकिएका छन् ।

Watch On

असोज ११ गतेको भारी वर्षासँगै आएको बाढीपहिरो र नदी कटानले सडक अवरुद्ध भएपछि ती सवारीसाधन गन्तव्यमा पुर्‍याउन नसकिएको हो । शुक्रबार साँझदेखि सडक सञ्चालनमा आए पनि अवस्था सहज नभएकाले सवारीसाधन ढुवानीमा समस्या भइरहेको छ ।

सशस्त्र प्रहरी बलको कोरलास्थित बोर्डर आउट पोस्ट (बीओपी) का अनुसार लोमान्थाङ गाउँपालिका–४, न्हेचुङस्थित मुस्ताङ भन्सार यार्ड र कोरलानाकाको खुला क्षेत्रमा दुई हजारभन्दा बढी विद्युतीय सवारी पार्किङ गरेर राखिएका छन् ।

बीओपीका इन्चार्ज सशस्त्र प्रहरी निरीक्षक प्रकाश धितालका अनुसार कोरलानाकाको दशगजा क्षेत्रमा विभिन्न कम्पनीका दुई हजारभन्दा बढी र भन्सार यार्डमा २०० भन्दा बढी विद्युतीय गाडी राखिएका छन् ।

‘कोरलानाका क्षेत्रमा भन्सार जाँचपास भइसकेपछि स्थानीय चालकले भन्सार कार्यालयसम्म ल्याइपुर्‍याउँछन् । त्यसपछि कम्पनीकै चालकले विद्युतीय गाडी तल झार्ने गर्छन्,’ धितालले भने, ‘नाकामा राखिएका गाडी भन्सार जाँचपासपछि तल पठाउन सहजीकरण गरेका छौँ ।’

कोरलानाकाबाट भन्सार जाँचपास गरेर जोमसोम झारिएका करिब ५०० भन्दा बढी विद्युतीय सवारी पनि त्यहाँका दुई पार्किङस्थलमा राखिएका छन् ।

बाढीपहिरोले सडक अवरुद्ध भएपछि बेनी–जोमसोम सडक सञ्चालनमा आए पनि अवस्था अझै नाजुक रहेकाले सवारीसाधन गन्तव्यतर्फ पठाउन नसकिएको बीवाईडीको आधिकारिक वितरक साइमेक्स इङ्कका प्रतिनिधि दीपक बुढाथोकीले बताए ।

उनका अनुसार सडक अवरुद्ध भएयता बीवाईडीका विभिन्न मोडलका दुई हजारभन्दा बढी गाडी मुस्ताङमै रोकिएका छन् । सवारीसाधन गन्तव्यतर्फ पठाउन आएका बुढाथोकीले साना गाडीलाई समेत सडकको अवस्थाका कारण लैजान समस्या भइरहेको बताए ।

जोमसोम बसपार्क र भन्सार कार्यालयको जोमसोमस्थित पार्किङस्थलमा ती गाडी राखिएका छन् । असोज ११ गतेअघि बीवाईडीका करिब ४५० गाडी गन्तव्यमा पठाइएको भए पनि त्यसपछि भित्रिएका गाडी सडकको अवस्थाका कारण पठाउन नसकिएको उनले बताए ।

रसुवा र तातोपानी नाका बन्द भएपछि साइमेक्स इङ्कले कोरलानाकाबाट करिब तीन हजार विद्युतीय गाडी भित्र्याउने योजना बनाएको पनि बुढाथोकीले जानकारी दिए ।

यसैबीच, कोरलानाकाबाट पैठारी गरिएका मालवस्तु बोकेका ६०० भन्दा बढी कन्टेनर सोमबारसम्म मुस्ताङबाट गन्तव्यतर्फ प्रस्थान गरिसकेको प्रहरीले जनाएको छ ।

प्रहरी निरीक्षक एवं सूचना अधिकारी सन्तोष बस्यालका अनुसार जिल्लामा रोकिएका कन्टेनर बाहिरिएसँगै मालवस्तु ढुवानीका लागि केही खाली कन्टेनर कोरलानाकातर्फ उकालो लागेका छन् ।