बूढीगण्डकी बाढीः उत्तरी गोरखाका पाँच हजार घर विद्युतविहीन

गोरखा । बूढीगण्डकीमा आएको बाढीले जलविद्युत् आयोजना र विद्युत् वितरण केन्द्रमा क्षति पुर्‍याउँदा उत्तरी गोरखाका करिब पाँच हजार घरमा विद्युत् सेवा अवरुद्ध भएको छ।

Watch On

बाढीले चुमनुब्री गाउँपालिका–३ जगतस्थित सिर्दिबास उहिया लघुजलविद्युत् आयोजना बगाएपछि चुमनुब्रीका वडा नं. ३ र ६ मा विद्युत् सेवा ठप्प भएको आयोजनाका अध्यक्ष सुजन गुरुङले बताए। उनका अनुसार लोक्पा, दुङ्ला, न्याक, फिलिम, चिसापानी, आंगा, सस्र्युँ, नाग्चेत, घट्टेखोला, पाङसिङ, जगत, सल्लेरी, पैयुँ, भालुवन र सिर्दिबासका ९७१ घरधुरी प्रभावित भएका छन्।

‘बाढीले विद्युत्का १२ पोल, एउटा टावर र तार बगाएको छ। पावर हाउस भने सुरक्षित छ,’ गुरुङले भने, ‘आइतबार बिहान ४ बजेदेखि यो भेगमा बिजुली छैन।’

विद्युत् र इन्टरनेट सेवा अवरुद्ध हुँदा चुमनुब्री गाउँपालिकाको प्रशासनिक कामसमेत ठप्प भएको प्रमुख प्रशासकीय अधिकृत नारायण सापकोटाले बताए। निजी संघसंस्था र स्थानीय नागरिक पनि प्रभावित भएका छन्।

‘बाढीले पुल, बाटो र बिजुली सबै बगायो। अहिलेको डिजिटल युगमा विद्युत् नहुँदा सूचना आदानप्रदानमा समस्या भएको छ,’ उनले भने। फिलिमका केही घरमा जडान गरिएका सोलारबाट मोबाइल चार्ज गरेर बाहिर फोन सम्पर्क गर्ने गरिएको उनले बताए।

चुमनुब्रीकी पूर्वउपाध्यक्ष कुमारी गुरुङका अनुसार बाढीले पुल र बाटो बगाउँदा एक गाउँबाट अर्को गाउँसम्म पुग्नसमेत कठिन भएको छ। ‘फिलिमबाट न तल जाने ठाउँ छ, न माथि जाने। पुल, बाटो सबै बगाएको छ। बिजुली पनि नहुँदा यो ठाउँ अन्धकार बनेको छ,’ उनले भनिन्।

बाढीले धार्चे गाउँपालिका पनि प्रभावित भएको छ। गाउँपालिकाका सातै वडाका करिब चार हजार घरमा विद्युत् सेवा अवरुद्ध भएको प्रमुख प्रशासकीय अधिकृत बुद्धिराम बस्नेतले बताए। उनका अनुसार बाढीले नेपाल विद्युत् प्राधिकरणको आरुघाटस्थित वितरण केन्द्रमा क्षति पुर्‍याएपछि गाउँपालिका अन्धकार बनेको हो।

‘बाढीले यहाँको बिजुली, सञ्चार, बाटोघाटो र पुल सबै बगायो,’ बस्नेतले भने।

यस्तै, आरुघाट गाउँपालिका–५ शान्तिबजार क्षेत्रका ५० घरधुरीमा पनि विद्युत् सेवा अवरुद्ध भएको गाउँपालिका अध्यक्ष राजु गुरुङले जानकारी दिए।