दसैँपछि नेपालमा भारी वर्षा हुन सक्ने एउटा मौसम मोडेलको संकेत

काठमाडौं । दसैँपछि कात्तिक १२–१३ गतेतिर नेपालमा भारी वर्षा हुन सक्ने संकेत एउटा मौसम मोडेलले देखाएको छ । अरब सागरमा सम्भावित चक्रवात बन्ने र त्यससँग सम्बन्धित मौसमी प्रणालीले नेपालमा वर्षा गराउन सक्ने अनुमान गरिएको हो ।

Watch On

मौसमसम्बन्धी जानकारी सार्वजनिक गर्दै मौसम अध्येता विनोद पोखरेलले यस्तो सम्भावना देखिए पनि अहिले नै भारी वर्षा हुने निश्चित नभएको बताएका छन् ।

उनले सामाजिक सञ्जालमा लेखेका छन्, ‘यो डर देखाउन नभई सम्भावनाबारे जानकारी दिन राखेको हुँ । यो निश्चित पूर्वानुमान वा चेतावनी होइन ।’

उनका अनुसार अझै करिब दुई हप्ता बाँकी रहेकाले अरब सागरमा चक्रवात बन्ने वा नबन्ने, यसको मार्ग कस्तो हुने र नेपालमा कस्तो प्रभाव पर्ने भन्ने विषय अनिश्चित छ । आगामी मौसम पूर्वानुमानका आधारमा थप जानकारी सार्वजनिक गर्ने उनले बताएका छन् ।

यसैबीच, दसैँको मौसमबारे जानकारी दिँदै पोखरेलले बिहीबार अपराह्न र राति कमजोर पश्चिमी वायुको प्रभावले पश्चिम नेपालका केही स्थानमा हल्का वर्षा हुन सक्ने बताएका छन् । यसको प्रभाव भोलिसम्म रहन सक्ने र पहाडी भूभागका थोरै स्थानमा मात्रै वर्षाको सम्भावना रहेको उनको भनाइ छ ।

उनका अनुसार अष्टमीदेखि दसैँभरि समग्रमा मौसम राम्रो रहने देखिए पनि केही स्थानमा छोटो समयका लागि हल्का वर्षा हुन सक्ने सम्भावना छ ।