स्थापना भएको २७ वर्षपछि नेपाल–कोरिया अस्पतालमा १५ शय्याको आईसीयू

भक्तपुर । अस्पताल स्थापना भएको २७ वर्षपछि मध्यपुरथिमि नगरपालिकाद्वारा सञ्चालित नेपाल–कोरियामैत्री नगरपालिका अस्पतालमा १५ शय्याको अत्याधुनिक सघन उपचारकक्ष (मोडुलर आईसीयू) सञ्चालनमा आएको छ ।

Watch On

मध्यपुरथिमि नगरपालिकाका प्रमुख एवं अस्पताल व्यवस्थापन समितिका अध्यक्ष सुरेन्द्र श्रेष्ठले आईसीयू सञ्चालनमा आएसँगै भक्तपुर र पूर्वी क्षेत्रबाट आएका बिरामीले अत्याधुनिक आईसीयूको खोजीमा काठमाडौं धाउनुपर्ने अवस्था अन्त्य हुने बताए ।

उनका अनुसार अस्पतालमा गम्भीर अवस्थाका बिरामीको उपचार र शल्यक्रियापछि सघन उपचारका लागि आईसीयू प्रभावकारी रूपमा प्रयोग हुनेछ । यसले अस्पतालले प्रदान गर्दै आएको गुणस्तरीय सेवामा थप सहयोग पुग्ने उनले बताए ।

“देशभरका नगरपालिकाद्वारा सञ्चालित अस्पतालमध्ये नेपाल–कोरियामैत्री अस्पताल सबैभन्दा सुविधासम्पन्न र ठूलो अस्पतालका रूपमा पहिचान बनाउन सफल भएको छ । बीमा क्लेम गर्ने पाँचौँ ठूलो अस्पतालसमेत बन्नु हाम्रा लागि गौरवको विषय हो,” नगरप्रमुख श्रेष्ठले भने, “नगरपालिकाले यस अस्पतालमा विशेषज्ञ सेवाहरू थप विस्तार गर्दै लैजानेछ ।”

अस्पतालमा उपचारका लागि आउने बिरामीको सङ्ख्या हरेक वर्ष बढ्दै गएको बताउँदै उनले अहिले दैनिक एक हजार १०० भन्दा बढी बिरामीले सेवा लिने गरेको जानकारी दिए ।

उनका अनुसार अस्पतालको नयाँ सुविधासम्पन्न भवन निर्माण अन्तिम चरणमा पुगेको छ । नयाँ भवन सञ्चालनमा आएपछि बिरामीले थप सुविधा पाउनेछन् । अस्पतालले छिट्टै मुटुरोग (कार्डियोलोजी) सेवा सञ्चालन गर्ने तयारी गरेको छ । मुटुरोगका बिरामीलाई सहजताका लागि ए ग्रेडको एम्बुलेन्ससमेत सञ्चालनमा ल्याउने तयारी भइरहेको उनले बताए ।

“हामीले बिरामीको घरदैलोमा सेवा प्रवाह गर्दै आएका छौँ । पोर्टेबल अल्ट्रासाउन्ड मेसिन खरिद गरेर वडावडामा पुगेर सेवा दिएकै कारण यो अस्पताल मुलुकका १० उत्कृष्ट सामुदायिक अस्पतालभित्र पर्न सफल भएको हो,” श्रेष्ठले भने, “चाँगुनारायण अस्पतालमा समेत यहाँबाट विशेषज्ञ सेवा दिँदै आएका छौँ ।”

कार्यक्रममा मध्यपुरथिमि नगरपालिकाका उपप्रमुख विजयकृष्ण श्रेष्ठले चार वर्षअघिसम्म घाटामा सञ्चालन भइरहेको अस्पताल गुणस्तरीय सेवा तथा सुविधा थपिएसँगै अहिले नाफामा पुगेको बताए । अस्पताललाई विशिष्टीकृत अस्पतालका रूपमा विकास गरिरहेको उनको भनाइ थियो ।

अत्याधुनिक आईसीयू सञ्चालनमा आएसँगै आईसीयू नपाएर बिरामीले अकालमा ज्यान गुमाउनुपर्ने अवस्था अन्त्य हुने विश्वास व्यक्त गर्दै उपप्रमुख श्रेष्ठले अस्पताललाई देशकै उत्कृष्ट अस्पतालका रूपमा विकास गर्ने बताए ।