सुन्दरी प्रतियोगिता रोकेर बुर्किना फासोमा युवतीहरूका लागि राष्ट्रिय विज्ञान प्रतिस्पर्धा

काठमाडौँ (एजेन्सी) । पश्चिम अफ्रिकी मुलुक बुर्किना फासोले देशका सुन्दरी (ब्युटी) प्रतियोगिताहरूमाथि पूर्ण रूपमा रोक लगाउँदै युवतीहरूलाई विज्ञान तथा प्रविधिको क्षेत्रमा प्रवर्द्धन गर्ने नयाँ अभियान सुरु गरेको छ।

Watch On

महिलाहरूलाई गणित, भौतिकशास्त्र, रसायनशास्त्र र इन्जिनियरिङ जस्ता प्राविधिक क्षेत्रमा आकर्षित गर्ने उद्देश्यले सरकारले यस्तो कदम चालेको हो।

यसै अभियानअन्तर्गत सरकारले गत अगस्ट महिनामा 'हाकिली मुसो' नामक राष्ट्रिय विज्ञान प्रतियोगिता आयोजना गरेको थियो। उक्त प्रतिस्पर्धामा देशभरका ८४ जना युवतीहरूले भाग लिएका थिए। गणित, भौतिकशास्त्र र रसायनशास्त्र विषयमा आधारित सो प्रतियोगितामा उत्कृष्ट प्रदर्शन गर्ने सहभागीहरूलाई नगद पुरस्कारका साथै उच्च शिक्षाका लागि छात्रवृत्ति प्रदान गरिएको छ। कार्यक्रमपछि बुर्किना फासोका राष्ट्रपति कप्तान इब्राहिम ट्राओरेले विजेता युवतीहरूसँग भेटघाट गर्दै उनीहरूलाई विज्ञानको क्षेत्रमा ठूलो लक्ष्य राख्न र आफ्नै क्षमतामा विश्वास गर्न ढाडस दिएका थिए।

सेनाको नेतृत्वमा रहेको कप्तान इब्राहिम ट्राओरेको सरकारले देशको 'सांस्कृतिक पहिचान, सामाजिक मूल्य-मान्यता र मानव मर्यादा'को संरक्षण गर्न सुन्दरी प्रतियोगिताहरू स्थगन गरिएको जनाएको छ। सञ्चार, संस्कृति तथा पर्यटन मन्त्रालयले जारी गरेको विज्ञप्ति अनुसार सौन्दर्य प्रतियोगिताहरूलाई राष्ट्रको मौलिक परम्परा र संस्कृति अनुकूल बनाउन नयाँ नियम तथा मापदण्डहरू तयार पारिँदै छ।

सरकारको यस निर्णयले सामाजिक सञ्जाल र अन्तर्राष्ट्रिय वृत्तमा व्यापक चर्चा पाएको छ। धेरै मानिसहरूले यसलाई महिला सशक्तिकरणको क्षेत्रमा एक दूरदर्शी कदम भन्दै प्रशंसा गरेका छन्। तथापि, केही अधिकारकर्मी तथा प्रयोगकर्ताहरूले भने यस कदमले महिलाको व्यक्तिगत रोजाइ र स्वतन्त्रतामाथि प्रश्न उठाएको बताएका छन्।