खुलामञ्च मर्मत गर्न कांग्रेसले आफ्नै खर्चमा ४५ दिनभित्र दुबो रोप्ने

काठमाडौँ । नेपाली कांग्रेसले १५औँ महाधिवेशनका क्रममा क्षति पुगेको खुलामञ्चको संरचना आफ्नै खर्चमा मर्मत गर्ने भएको छ। कांग्रेसले ४५ दिनभित्र खुलामञ्चलाई पूर्ववत् अवस्थामा फर्काउने गरी सेवा प्रदायक संस्था माउन्ट एभरेस्ट स्पोर्टस् एन्ड इभेन्ट्स प्रालिसँग सम्झौता गरेको छ।

Watch On

असोज १८ देखि २३ गतेसम्म खुलामञ्चमा आयोजित महाधिवेशनका क्रममा क्षति पुगेका भागमा नयाँ दुबो रोप्ने, जमिन सम्याउने र त्यसको स्याहारसम्भार गर्ने जिम्मेवारी कांग्रेसले लिएको हो। काठमाडौँ महानगरपालिकाको नियम र मापदण्डअनुसार खुलामञ्चलाई पुरानै अवस्थामा फर्काउन लाग्ने सम्पूर्ण खर्च पार्टीले नै बेहोर्ने सहमति भएको कांग्रेसका कार्यवाहक मुख्यसचिव कृष्णप्रसाद दुलालले जानकारी दिए।

मर्मतसम्बन्धी सम्झौतामा कांग्रेस महाधिवेशनबाट वरिष्ठ उपसभापतिमा निर्वाचित विश्वप्रकाश शर्माको रोहवरमा दुलाल र माउन्ट एभरेस्ट इभेन्ट्सका प्रतिनिधि थमन भुषालले हस्ताक्षर गरेका छन्।

सम्झौताअनुसार सुरुका १५ दिनभित्र क्षति पुगेका भागमा दुबो रोप्ने काम सम्पन्न गरिनेछ। त्यसपछिका ३० दिन दुबो हुर्काउने, सिँचाइ गर्ने र परिसरलाई हराभरा बनाउने काम गरिनेछ। दुबो रोप्ने मात्र नभई त्यसको उचित स्याहार तथा संरक्षणका लागि प्राविधिक रेखदेखसमेत गरिनेछ।

दुबो रोप्ने र त्यसको स्याहारसम्भार गर्ने काममा कांग्रेसको काठमाडौँ महानगर समितिलाई स्वयंसेवक परिचालनको जिम्मेवारी दिइएको छ। उक्त कामको संयोजन काठमाडौँ महानगर सभापति इन्जिनियर सुसन वैद्यले गर्नेछन्।

मर्मतसम्भारको काम पूरा भएपछि काठमाडौँ महानगरपालिकाको मापदण्डअनुसार खुलामञ्चलाई हस्तान्तरण गरिने वैद्यले बताए।

सम्झौताअनुसार कुल रकमको ८० प्रतिशत पेश्की उपलब्ध गराइनेछ भने बाँकी २० प्रतिशत काम सम्पन्न भएपछि भुक्तानी गरिनेछ।

सार्वजनिक कार्यक्रमका क्रममा क्षति पुगेको खुलामञ्चलाई मर्मत गरी पुनः प्रयोगयोग्य अवस्थामा फर्काउने जिम्मेवारी कांग्रेसले लिएको हो।