चिकित्सा शिक्षामा ४१८ सिट थप

काठमाडौं । चिकित्सा शिक्षा आयोगले चालु शैक्षिक सत्र २०८३/८४ का लागि चिकित्सा शिक्षाका विभिन्न कार्यक्रममा ४१८ सिट थप गर्ने निर्णय गरेको छ। थपिएका सिट सरकारी शिक्षण संस्थामा केन्द्रित गरिएको छ भने निजी मेडिकल कलेजको सिट सङ्ख्या यथावत् राखिएको छ।

Watch On

प्रधानमन्त्री बालेन्द्र शाहको अध्यक्षतामा बसेको चिकित्सा शिक्षा आयोगको बैठकले यस शैक्षिक सत्रका लागि कुल ९ हजार ६९१ सिट निर्धारण गरेको हो। यो सङ्ख्या गत शैक्षिक सत्रको तुलनामा ४१८ ले बढी हो।

सिट निर्धारणका लागि देशभरका ९० वटा शिक्षण संस्थाले स्वमूल्याङ्कन फाराम भरेर सिट माग गरेका थिए। अनुगमन टोलीले दिएको प्रतिवेदनका आधारमा तीमध्ये ८४ वटा शिक्षण संस्थाका लागि यस वर्ष सिट निर्धारण गरिएको आयोगले जनाएको छ।

आयोगका सदस्यसचिव हरिप्रसाद निरौलाका अनुसार एमबीबीएसतर्फ गत वर्षको तुलनामा ११० सिट थप गरिएको छ। सहिद दशरथ चन्द स्वास्थ्य विज्ञान विश्वविद्यालयले एमबीबीएसका लागि ५० सिट पाएको छ भने बीपी कोइराला स्वास्थ्य विज्ञान प्रतिष्ठान र नेपाली सेना स्वास्थ्य विज्ञान प्रतिष्ठानमा ३०–३० सिट थप गरिएको छ।

‘निजी मेडिकल कलेजको हकमा भने यस वर्ष सिट वृद्धि गरिएको छैन। एमबीबीएसमा बढेको सिट सरकारी संस्थाको मात्र हो,’ सदस्यसचिव निरौलाले भने।

एमबीबीएसबाहेक अन्य चिकित्सा शिक्षा कार्यक्रमका सिट पनि बढाइएको छ। उनका अनुसार बीएससी नर्सिङतर्फ गत वर्षको तुलनामा २१० सिट र बीएमएसतर्फ ९८ सिट थप गरिएको छ।