समाज

चिकित्सा शिक्षामा थपिएका ४१८ सिट सबै सरकारी शिक्षण संस्थामा : मन्त्री पोखरेल

सिधाकुरा

शनिबार, असोज ३१, २०८३

चिकित्सा शिक्षामा थपिएका ४१८ सिट सबै सरकारी शिक्षण संस्थामा : मन्त्री पोखरेल

काठमाडौं । शिक्षा तथा खेलकुदमन्त्री सस्मिता पोखरेलले चालु शैक्षिक सत्रमा चिकित्सा शिक्षातर्फ थपिएका ४१८ वटै सिट सरकारी शिक्षण संस्थालाई दिइएको बताएकी छन्।

Watch On

मन्त्री पोखरेलले शनिबार सार्वजनिक सन्देशमार्फत निजी कलेजको सिट संख्या यथावत् राखेर थप सिट सरकारी शिक्षण संस्थालाई दिइएको जानकारी दिएकी हुन्।

उनका अनुसार निजी क्षेत्रलाई निरुत्साहित गर्नु नभई जेहेन्दार विद्यार्थीले कम शुल्कमा सरकारी शिक्षण संस्थामा अध्ययन गर्ने अवसर पाऊन् भन्ने उद्देश्यले यस्तो निर्णय गरिएको हो।

थपिएका सिटमध्ये एमबीबीएसतर्फ ११०, बीएससी नर्सिङतर्फ २१० र बीएमएसतर्फ ९८ सिट छन्।

सुदूरपश्चिमको गेटास्थित सहिद दशरथ चन्द स्वास्थ्य विज्ञान विश्वविद्यालयमा ५० सिटसहित एमबीबीएसको पठनपाठन सुरु हुने भएको छ। त्यस्तै, धरानस्थित बीपी कोइराला स्वास्थ्य विज्ञान प्रतिष्ठान र नेपाली सेना स्वास्थ्य विज्ञान प्रतिष्ठानमा एमबीबीएसतर्फ ३०–३० सिट थपिएका छन्।

मन्त्री पोखरेलले नेपालमै गुणस्तरीय चिकित्सा शिक्षाको पहुँच विस्तार गर्न र विद्यार्थीलाई आफ्नै देशमा चिकित्सक तथा नर्स बन्ने वातावरण तयार गर्न सरकार क्रियाशील रहेको बताएकी छन्।

उनले विद्यार्थीको उज्ज्वल भविष्य निर्माण गर्ने प्रयासमा सबैको साथ र विश्वासको अपेक्षासमेत गरेकी छन्।

प्रकाशित मिति: शनिबार, असोज ३१, २०८३

प्रतिक्रिया दिनुहोस्