उपराष्ट्रपति यादवको शुभकामना : दसैँले सद्भाव र राष्ट्रिय एकताको भावना बलियो बनाओस्

काठमाडौं । उपराष्ट्रपति रामसहाय प्रसाद यादवले विजयादशमीले विभाजन र वैमनस्यभन्दा माथि उठेर सामाजिक सद्भाव, राष्ट्रिय एकता र सहअस्तित्वको भावना बलियो बनाउन प्रेरणा दिने विश्वास व्यक्त गरेका छन्।

Watch On

विजयादशमी, २०८३ का अवसरमा शुभकामना सन्देश जारी गर्दै उपराष्ट्रपति यादवले दसैँ धार्मिक आस्थाको पर्व मात्र नभई मानवीय मूल्य, नैतिकता र सदाचारको विजयको उत्सव भएको बताएका छन्।

उनले सत्य, न्याय, धर्म र सदाचारको अन्ततः विजय हुन्छ भन्ने सन्देश बोकेको दसैँले मानिसलाई आफ्नो आचरण र व्यवहारको आत्मसमीक्षा गर्ने अवसर प्रदान गर्ने उल्लेख गरेका छन्।

‘विजयादशमीले असत्य, अन्याय, विभेद, हिंसा र नकारात्मक प्रवृत्तिमाथि मानवता, विवेक र नैतिक शक्तिको विजय सुनिश्चित हुने विश्वासलाई थप बलियो बनाउँछ,’ शुभकामना सन्देशमा भनिएको छ।

दसैँले समाजमा सहिष्णुता, आत्मानुशासन, संयम र कर्तव्यप्रतिको निष्ठा प्रवर्द्धन गर्ने उल्लेख गर्दै उपराष्ट्रपतिले लोभ, घृणा, अहंकार, ईर्ष्या र वैमनस्यजस्ता दुर्गुण त्यागेर सहकार्य, समर्पण, सद्भाव र मानवीय संवेदनाको मार्गमा अघि बढ्न प्रेरित गर्ने बताएका छन्।

व्यक्तिको आन्तरिक शुद्धीकरण र सामाजिक उत्तरदायित्वबीच सन्तुलन कायम राख्न विजयादशमीको विशेष महत्त्व रहेको उनको भनाइ छ।

दसैँलाई पुनर्मिलन र आत्मीयताको पर्वका रूपमा उल्लेख गर्दै उपराष्ट्रपतिले शिक्षा, रोजगारी, व्यवसायलगायत कारणले परिवार र समुदायबाट टाढा रहेका व्यक्तिले यस अवसरमा प्रियजनसँग भेटघाट गरी सम्बन्ध नवीकरण गर्ने परम्परा रहेको बताएका छन्।

‘ज्येष्ठको आशीर्वाद, अग्रजप्रतिको सम्मान र कनिष्ठप्रतिको स्नेह आदानप्रदानले पारिवारिक तथा सामाजिक सम्बन्धलाई अझ बलियो बनाउने अवसर प्राप्त हुन्छ,’ सन्देशमा भनिएको छ।

परम्परागत संस्कार, लोककला, लोकसङ्गीत, सांस्कृतिक अभ्यास र सामुदायिक गतिविधिले राष्ट्रिय पहिचानलाई समृद्ध बनाएको उल्लेख गर्दै उनले विजयादशमीजस्ता पर्वले सांस्कृतिक सम्पदाको संरक्षण र प्रवर्द्धनमा महत्त्वपूर्ण योगदान पुर्‍याउने बताएका छन्।

परिवर्तित विश्व परिस्थितिमा सामाजिक सद्भाव, राष्ट्रिय एकता, आपसी सम्मान र सहअस्तित्वको भावना अझ आवश्यक रहेको उनको भनाइ छ। साझा राष्ट्रिय हित, सामाजिक समरसता र समुन्नत नेपालको निर्माणतर्फ अग्रसर हुन दसैँले प्रेरणा प्रदान गरोस् भन्ने कामनासमेत उनले गरेका छन्।

उपराष्ट्रपति यादवले विजयादशमीले प्रत्येक नेपालीको जीवनमा आशा, ऊर्जा, आत्मविश्वास र सफलताको नयाँ अध्याय सुरु गराओस् भन्दै स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइमा सुख, शान्ति, समृद्धि, सुस्वास्थ्य, दीर्घायु र उत्तरोत्तर प्रगतिको शुभकामना व्यक्त गरेका छन्।