समाज

चाडपर्वमा सडक अवरोध हुन नदिन उपकरण र जनशक्ति तयारी अवस्थामा राखिएको छ– मन्त्री लम्साल

सिधाकुरा

शनिबार, असोज ३१, २०८३

चाडपर्वमा सडक अवरोध हुन नदिन उपकरण र जनशक्ति तयारी अवस्थामा राखिएको छ– मन्त्री लम्साल

काठमाडौं । पूर्वाधार विकासमन्त्री सुनील लम्सालले चाडपर्वका बेला सडक अवरोध हुन नदिन जोखिमयुक्त सडक खण्डमा हेभी डोजर, लोडरलगायत उपकरण र प्राविधिक जनशक्ति तयारी अवस्थामा राखिएकाे बताएका छन्।

Watch On

लगातारको वर्षा र बाढीका कारण देशका विभिन्न राजमार्ग तथा मुख्य सडक अझै संवेदनशील र जोखिमपूर्ण अवस्थामा रहेकाले आवश्यक सतर्कता अपनाउन मन्त्रालयअन्तर्गतका सबै डिभिजन तथा आयोजना प्रमुखहरूलाई निर्देशन दिएको उनले बताएका हुन्।

सामाजिक सञ्जालमार्फत मन्त्री लम्सालले सामान्य वर्षा वा सानो पहिरोले समेत मुख्य राजमार्ग अवरुद्ध हुन सक्ने अवस्थालाई ध्यानमा राखेर सर्वसाधारणको यात्रा सुरक्षित, सहज र निर्बाध बनाउन तयारी गरिएको जानकारी दिएका छन्।

उनका अनुसार सडक अवरुद्ध भएमा तत्काल खुलाउन र सम्बन्धित सरोकारवाला निकायसँग निरन्तर समन्वय गर्नसमेत निर्देशन दिइएको छ।

त्यस्तै, आकस्मिक अवस्थाको तत्काल व्यवस्थापनका लागि कार्यालय प्रमुख तथा सम्बन्धित प्राविधिक कर्मचारीलाई चाडपर्व अवधिभर सम्पर्कमा रहन र उच्च सतर्कताका साथ जिम्मेवारी निर्वाह गर्न भनिएको उनले उल्लेख गरेका छन्।

प्रकाशित मिति: शनिबार, असोज ३१, २०८३

प्रतिक्रिया दिनुहोस्