कोलकाताको दुर्गा पूजामा भागदौड: १९ जनाको मृत्यु, २४ घाइते

कोलकाता । भारतको कोलकातास्थित प्रसिद्ध चोरबागान दुर्गा पूजा पण्डालमा शनिबार साँझ भीषण भागदौड मच्चिँदा १९ जनाको ज्यान गएको छ। यो दुर्घटनामा २४ जना घाइते भएका छन्, जसमा एक जनाको अवस्था गम्भीर छ। ज्यान गुमाउनेहरूमा धेरैजसो महिला र बालबालिका छन्।

Watch On

घटना शनिबार साँझ करिब साढे ७ बजे भएको हो। मुख्यमन्त्री सुभेन्दु अधिकारीका अनुसार सुरुमा १७ जनाको मृत्यु भएको पुष्टि भए पनि पछि थप दुई जनाको उपचारका क्रममा ज्यान गएको हो। यस त्रासदीपूर्ण घटनापछि राज्य सरकारले आफ्ना सबै पूर्वनिर्धारित कार्यक्रमहरूका साथै भारतका गृहमन्त्री अमित शाहको पश्चिम बंगाल भ्रमण कार्यक्रमसमेत रद्द गरेको छ।

ठूलो वर्षा, साँघुरो बाटो र अन्धकारका कारण दुर्घटना
विगत ९१ वर्षदेखि दुर्गा पूजा आयोजना गर्दै आएको चोरबागान पण्डालमा यसअघि यस्तो दुर्घटना कहिल्यै भएको थिएन। प्रत्यक्षदर्शीहरूका अनुसार महासप्तमीको साँझ एकाएक ठूलो वर्षा सुरु भएपछि बाहिर रहेका श्रद्धालुहरू ओत लाग्न पण्डालभित्र छिर्ने क्रममा अत्यधिक चाप बढेको थियो। निकासी मार्ग साँघुरो हुनु, पण्डाल परिसरमा पर्याप्त बत्ती नभई अन्धकार हुनु र भुइँमा हिलो तथा पानीका कारण मानिसहरू लडेर एकमाथि अर्को खप्टिन पुगेका थिए। घटनाका एक पीडितले भने, "त्यहाँ ठाउँ धेरै साँघुरो थियो र मानिसहरूको ठूलो लाइन थियो। पण्डालमा पूर्ण रूपमा अन्धकार थियो। दुर्घटना भएको आधा घण्टासम्म पनि त्यहाँ कुनै पुलिस वा स्वयंसेवक उद्धारका लागि आइपुगेका थिएनन्।"

राहत र क्षतिपूर्तिको घोषणा
दुर्घटनापछि राज्य तथा केन्द्र सरकारले पीडित परिवारहरूका लागि राहत र क्षतिपूर्तिको घोषणा गरेका छन् । मुख्यमन्त्री सुभेन्दु अधिकारीका अनुसार मृतकका प्रत्येक परिवारलाई २५ लाख रुपैयाँ नगद क्षतिपूर्ति र परिवारका एक सदस्यलाई सरकारी जागिर दिइनेछ। घाइतेहरूको उपचारको सम्पूर्ण खर्च राज्य सरकारले व्यहोर्नेछ भने उनीहरूलाई जनही ५ लाख रुपैयाँ उपलब्ध गराइनेछ। प्रधानमन्त्री नरेन्द्र मोदीले घटनाप्रति गहिरो दुख व्यक्त गर्दै प्रधानमन्त्री राष्ट्रिय राहत कोषबाट मृतकका परिवारलाई जनही २ लाख रुपैयाँ र घाइतेहरूलाई ५० हजार रुपैयाँ आर्थिक सहयोग दिने घोषणा गरेका छन् । 

न्यायाधीशबाट उच्चस्तरीय जाँच हुने
घटनाको गम्भीरतालाई ध्यानमा राख्दै मुख्यमन्त्रीले कोलकाता उच्च अदालतका बहालवाला न्यायाधीशको अध्यक्षतामा निष्पक्ष न्यायिक जाँच गराइने घोषणा गरेका छन्। यसैगरी, कोलकाता पुलिसको फरेन्सिक टोलीले पण्डाल क्षेत्रका सीसीटीभी फुटेज संकलन गरी अनुसन्धान सुरु गरेको छ। सुरक्षा र व्यवस्थापनमा लापरवाही गर्ने जोकोहीलाई कडा कानुनी कारबाही गरिने प्रशासनले जनाएको छ।

पश्चिम बंगालभरि यस वर्ष करिब ५८ हजार स्थानमा दुर्गा पूजा आयोजना भइरहेको छ। राज्यकै सबैभन्दा ठूलो र प्रसिद्ध यो पर्व हेर्न देश-विदेशबाट लाखौँ श्रद्धालु तथा पर्यटकहरू पुग्ने गर्दछन्।