महाअष्टमीमा शक्तिपीठमा भक्तजनको घुइँचो

काठमाडौं । बडादसैँअन्तर्गत नवरात्रको आठौँ दिन महाअष्टमीका अवसरमा काठमाडौं उपत्यकासहित देशभरका शक्तिपीठ तथा देवी मन्दिरमा भक्तजनको घुइँचो लागेको छ।

Watch On

महाअष्टमीमा देवी दुर्गाका विभिन्न स्वरूपको पूजाआराधना गर्ने परम्पराअनुसार बिहानैदेखि मन्दिरमा दर्शनार्थी पुगेका हुन्। काठमाडौं उपत्यकाका गुह्येश्वरी, मैतीदेवी, कालिकास्थान, नक्साल भगवती, भद्रकाली, शोभा भगवती, विजेश्वरी, इन्द्रायणी, रक्तकाली, श्वेतकाली, चामुण्डामाई, सुन्दरीमाई, बज्रयोगिनी, तलेजु भवानी र टोखाको चण्डेश्वरीमा भक्तजनको भीड लागेको छ।

त्यस्तै, काठमाडौंको दक्षिणकाली, गोरखाको मनकामना, ताप्लेजुङको पाथीभरा, ललितपुरको बगलामुखी, पोखराको विन्ध्यवासिनी, काभ्रेपलाञ्चोकको पलाञ्चोक भगवती, जुम्लाको चन्दननाथ, डोटीको शैलेश्वरी, डडेलधुराको उग्रतारा भगवती र बैतडीको त्रिपुरासुन्दरी मन्दिरमा पनि बिहानैदेखि दर्शनार्थी पुगेका छन्।

नेपालगञ्जको वागीश्वरी, सप्तरीको छिन्नमस्ता भगवती र राजदेवी, धनकुटाको जाल्पादेवी, धरानको दन्तकाली तथा बाराको गढीमाईमा समेत पूजाआराधना गर्ने भक्तजनको भीड लागेको स्थानीय समाचारदाताहरूले जनाएका छन्। महाअष्टमीका अवसरमा शक्तिपीठहरूलाई ध्वजापताकाले सजाइएको छ।

शारदीय नवरात्रको आठौँ दिन मनाइने महाअष्टमीमा महाकाली, महालक्ष्मी र महासरस्वतीको विशेष पूजा गरिन्छ। धार्मिक मान्यताअनुसार यस दिन शक्तिपीठमा दर्शन तथा पूजाआराधना गर्दा मनोकामना पूरा हुने विश्वास छ। नवरात्रका नौ दिन देवीको विशेष साधना र उपासना गर्ने परम्परासमेत छ।