कालीगण्डकी करिडोर प्रसारण लाइन सञ्चालनमा, १७० मेगावाट विद्युत् राष्ट्रिय प्रणालीमा

काठमाडौं । बाढीपहिरो र कालीगण्डकी नदीको कटानले क्षतिग्रस्त कालीगण्डकी करिडोर २२० केभी प्रसारण लाइनको दाना–राहुघाट खण्ड २१ दिनपछि पुनः सञ्चालनमा आएको छ। प्रसारण लाइन सञ्चालनमा आएसँगै पाँच जलविद्युत् आयोजनाबाट उत्पादित १७० मेगावाट विद्युत् राष्ट्रिय प्रसारण प्रणालीमा जोडिएको छ।

Watch On

नेपाल विद्युत् प्राधिकरणले आपत्कालीन पुनःस्थापना प्रणाली (इआरएस) का टावर प्रयोग गरी म्याग्दीस्थित उक्त खण्ड अस्थायी रूपमा सञ्चालनमा ल्याएको हो। गए रातिदेखि प्रसारण लाइनको एउटा सर्किट चार्ज गरेर सञ्चालनमा ल्याइएको प्राधिकरणले जनाएको छ।

बाढीले म्याग्दीको अन्नपूर्ण गाउँपालिका–६, पोखरेबगरस्थित प्रसारण लाइनका चार टावरमा क्षति पुर्‍याएको थियो। टावर नम्बर २१, २३ र २४ पूर्ण रूपमा क्षतिग्रस्त भएका थिए भने टावर नम्बर २२ मा आंशिक क्षति पुगेको थियो।

प्रसारण लाइन अवरुद्ध हुँदा दाना सबस्टेसनमार्फत राष्ट्रिय प्रणालीमा जोडिएका निजी क्षेत्रका पाँच जलविद्युत् आयोजनाको १७० मेगावाट विद्युत् प्रवाह हुन सकेको थिएन। लाइन पुनः सञ्चालनमा आएपछि ती आयोजनाको विद्युत् राष्ट्रिय प्रणालीमा प्रवाह हुन थालेको छ।

कालीगण्डकी र यसका सहायक नदीमा निर्माण भएका जलविद्युत् आयोजनाको विद्युत् राष्ट्रिय प्रणालीमा जोड्ने उद्देश्यले कालीगण्डकी करिडोर २२० केभी डबल सर्किट प्रसारण लाइन निर्माण गरिएको हो।

म्याग्दीको अन्नपूर्ण गाउँपालिका–३ स्थित दाना सबस्टेसनबाट सुरु हुने यो प्रसारण लाइन पर्वत, बागलुङ, स्याङ्जा, पाल्पा र रुपन्देही हुँदै नवलपरासी (बर्दघाट सुस्ता पश्चिम) को सुनवल नगरपालिका–१३ स्थित नयाँ बुटवल सबस्टेसनसम्म पुग्छ। करिब १३० किलोमिटर लामो यस प्रसारण लाइनको विद्युत् प्रवाह क्षमता १२०० मेगावाट छ।