भारतीय स्कारपियोको ठक्करबाट बारामा १७ वर्षीय मोटरसाइकल चालकको मृत्यु, दुई घाइते

बारा । बाराको महागढीमाई नगरपालिका–१ स्थित हुलाकी राजमार्गमा भारतीय नम्बर प्लेटको स्कारपियोले मोटरसाइकललाई ठक्कर दिँदा १७ वर्षीय चालकको मृत्यु भएको छ । दुर्घटनामा मोटरसाइकलमा सवार अन्य दुई जना घाइते भएका छन् ।

Watch On

आइतबार बिहान करिब ११:३० बजे महागढीमाई नगरपालिका–१ स्थित प्लाई फ्याक्ट्री चोकमा दुर्घटना भएको हो । बरियारपुरबाट कलैयातर्फ जाँदै गरेको भारतीय नम्बर प्लेट बीआर १९ जी ९९२१ को स्कारपियोले विपरीत दिशाबाट आउँदै गरेको बागमती प्रदेश ०३–००५ प ८८५५ नम्बरको मोटरसाइकललाई ठक्कर दिएको थियो ।

दुर्घटनामा मोटरसाइकल चालक कलैया उपमहानगरपालिका–२१ निवासी १७ वर्षीय धिरज यादव, मोटरसाइकलमा सवार भोडहा निवासी १६ वर्षीय नगेश साह र १८ वर्षीय अरुण यादव घाइते भएका थिए ।

घाइते तीनै जनालाई उपचारका लागि एलएस न्युरो अस्पताल पठाइएको थियो । उपचारका क्रममा बिहान ११:५५ बजे मोटरसाइकल चालक धिरजको मृत्यु भएको प्रहरीले जनाएको छ । अन्य दुई जनाको सोही अस्पतालमा उपचार भइरहेको छ ।

दुर्घटनाको खबर प्राप्त हुनासाथ प्रहरी चौकी बरियारपुरबाट प्रहरी टोली घटनास्थलमा पुगेको थियो ।

दुर्घटनामा संलग्न स्कारपियो र त्यसका चालक रौतहटको परोहा नगरपालिका–३ निवासी ३८ वर्षीय अरुणकुमार दुबेलाई प्रहरीले नियन्त्रणमा लिएको छ ।

घटनाबारे थप अनुसन्धान भइरहेको प्रहरीले जनाएको छ ।