दसैँ बिदामा पनि चितवन मेडिकल कलेजको विशेषज्ञ सेवा सञ्चालन हुने

नारायणगढ (चितवन) । चितवन मेडिकल कलेज (सिएमसी) शिक्षण अस्पतालले दसैँ बिदामा पनि विशेषज्ञ चिकित्सकसहितको उपचार सेवा सञ्चालन गर्ने भएको छ।

Watch On

अस्पतालले कात्तिक २ देखि ५ गतेसम्म चार दिन आकस्मिक कक्षबाट सबै प्रकारका सेवा उपलब्ध गराउने जनाएको छ। उक्त अवधिमा रेडियोलोजी, प्रयोगशाला र अन्तरङ्ग सेवा पनि नियमित सञ्चालन हुनेछन्।

अस्पतालका निर्देशक प्रा. डा. गोपेन्द्र देवका अनुसार बडादसैँका अष्टमीदेखि एकादशीसम्म बिरामीले सहज रूपमा उपचार सेवा पाऊन् भन्ने उद्देश्यले बिदाका दिनमा पनि अस्पताल सञ्चालन गर्न लागिएको हो।

“दसैँका समयमा पनि चितवन मेडिकल कलेजले आफ्नो सेवालाई निरन्तरता दिनेछ। हामी सकेसम्म सबै स्वस्थ रहून् भन्ने चाहन्छौँ। तर बिरामी हुनुभयो वा कुनै स्वास्थ्य समस्या देखियो भने अस्पताल आउनुहोला, सेवा दिन तयार छौँ,” उनले भने।

चाडपर्वका समयमा हुन सक्ने दुर्घटनाका घाइते, हृदयाघात, खाना अपच तथा झाडापखालालगायतका समस्या बढी देखिन सक्ने भएकाले विशेषज्ञ चिकित्सकसहित आकस्मिक कक्षबाटै उपचार सेवा दिने व्यवस्था गरिएको उनले बताए।

अस्पतालका प्रमुख कार्यकारी अधिकृत प्रताप देवकोटाले दसैँ बिदामा अस्पताल बन्द हुने आशङ्काले बिरामी अन्योलमा पर्न सक्ने भएकाले सेवा सञ्चालनबारे जानकारी गराइएको बताए। अन्य कतिपय अस्पतालमा नियमित सेवा बन्द वा सीमित हुने भएकाले बिरामीलाई असहज नहोस् भन्ने उद्देश्यले आकस्मिक कक्षलाई थप चुस्त बनाइएको उनको भनाइ छ।

“आकस्मिक कक्षमा थप डेस्क राखेर ओपिडी सेवा लिनुपर्ने बिरामीलाई पनि सेवा दिने गरी तयारी गरेका छौँ,” देवकोटाले भने।

पुराना रोग भएका बिरामीलाई नियमित परामर्श आवश्यक पर्न सक्ने र आकस्मिक स्वास्थ्य समस्या जुनसुकै समयमा पनि उत्पन्न हुन सक्ने भएकाले अस्पतालले बिदाका दिनमा समेत सेवा सञ्चालनलाई प्राथमिकता दिएको उनले बताए।