यात्राप्रेमलाई उद्यममा बदलेकी सिर्जनालाई मन्त्री साेबिताको यस्तो बधाई

काठमाडौँ। यात्राप्रतिको रुचिलाई उद्यममा बदल्दै सिर्जना सिज्जुले बागलुङको ढोरपाटनमा प्रकृतिमैत्री रिसोर्ट ‘सिज्जइको क्याम्प’ सञ्चालनमा ल्याएकी छन्।

Watch On

नेपालका विभिन्न ठाउँ घुम्दै ओझेलमा परेका पर्यटकीय गन्तव्य पहिचान गर्ने र तिनलाई यात्रुहरूमाझ चिनाउने काम गर्दै आएकी सिज्जुले आफूलाई मन परेको ढोरपाटनमा रिसोर्ट स्थापना गरेकी हुन्।

यसपालिको दसैँको छोटो बिदामा ढोरपाटनस्थित रिसोर्ट पुगेकी कानून, न्याय तथा संसदीय मामिला सोबिता गौतमले सिज्जुको प्रयासको प्रशंसा गर्दै आफ्नै देशमा सम्भावना खोज्न र उद्यम गर्न युवाहरूलाई आग्रह गरेकी छन्।

यात्राप्रतिको आफ्नो रुचि र सिज्जुको उद्यमशीलताबीच तुलना गर्दै मन्त्री गौतमले यात्राका क्रममा देखेका समस्या समाधान गर्न आफूले राजनीतिक तथा कानुनी बाटो रोजेको र सिज्जुले पर्यटनप्रतिको रुचिलाई पेसा बनाएको उल्लेख गरेकी छन्।

‘नेपालमा सम्भावना छैन भन्ने होइन, सम्भावना पहिचान गर्ने दृष्टि, त्यसलाई पछ्याउने धैर्य र साकार पार्ने समर्पण चाहिन्छ,’ गौतमले सामाजिक सञ्जालमा लेखेकी छन्।

उनले युवाहरूलाई आफ्नो रुचि र क्षमता पहिचान गर्न, नयाँ ठाउँ घुम्न, सिक्न र प्रयोग गर्न आग्रह गरेकी छन्। सबैले हिँडेको बाटो पछ्याउनैपर्छ भन्ने नभएको भन्दै उनले आवश्यक परे आफ्नै बाटो बनाउनुपर्ने बताएकी छन्।

‘हामीले खोजेको भविष्य यही देशमा पनि बनाउन सकिन्छ। त्यसका लागि सपना मात्र होइन, निरन्तर साधना र साहस चाहिन्छ,’ उनले लेखेकी छन्।

गौतमले ढोरपाटनलाई रमणीय गन्तव्यका रूपमा उल्लेख गर्दै समय मिलाएर घुम्न आउन पनि आग्रह गरेकी छन्। नेपालमै सम्भावना खोज्ने, उद्यम गर्ने र नयाँ पर्यटकीय गन्तव्य निर्माण गर्ने युवाहरूलाई चिन्ने, प्रोत्साहन गर्ने र एकअर्कालाई सहयोग गर्ने उनको अपिल छ।

गौतमको उक्त पोस्टमा प्रतिक्रिया जनाउँदै सामाजिक सञ्जालका प्रयोगकर्ताहरूले पनि सिज्जुको उद्यमशीलताको प्रशंसा गरेका छन्। उनीहरूले आफ्नै देशमा अवसर सिर्जना गर्न सकिने सन्देश युवाहरूमाझ पुर्‍याउनुपर्ने बताएका छन्।