बाढीपहिरोबाट जलजलाका ३१६ घरमा क्षति, ३५ परिवार विस्थापित

म्याग्दी । पछिल्लो मनसुनजन्य विपद्बाट पर्वतको जलजला गाउँपालिकामा ३१६ घरमा क्षति पुगेको छ भने पहिरोका कारण ३५ परिवार विस्थापित भएका छन्।

Watch On

गत असोज ८ देखि ११ गतेसम्म परेको अविरल वर्षापछि कालीगण्डकी नदीमा आएको बाढी र विभिन्न स्थानमा गएको पहिरोले घर, खेतीयोग्य जमिन तथा भौतिक पूर्वाधारमा क्षति पुर्‍याएको गाउँपालिकाले जनाएको छ।

गाउँपालिकाका प्रमुख प्रशासकीय अधिकृत सन्दीप काफ्लेका अनुसार १२६ घर पूर्ण र ५० घरमा आंशिक क्षति पुगेको छ। थप १४० घर जोखिममा रहेको विवरण सङ्कलन भएको छ।

बाढीपहिरोले निजी आवाससँगै कोदो, धानलगायत खाद्यबाली र सुन्तलाखेती भएको जमिनमा क्षति पुर्‍याएको छ। सडक, खानेपानी, सिँचाइ तथा बस्ती संरक्षणका लागि निर्माण गरिएका पूर्वाधारसमेत प्रभावित भएका छन्।

सबैभन्दा बढी क्षति जलजला गाउँपालिका–८ फर्सेमा भएको छ। त्यहाँ बाढीले ७५ घर बगाएको छ भने थप २७ घर जोखिममा छन्। वडा नं. ७ का ताङवाङ र खानीगाउँ तथा वडा नं. ४ को लामाखेतमा पनि बाढीपहिरोले क्षति पुर्‍याएको छ।

पहिरोले बस्ती जोखिममा पारेपछि ताङवाङ र खानीगाउँका ३५ परिवार विस्थापित भएको गाउँपालिकाका उपाध्यक्ष दीपक आचार्यले बताए।

“पहिरोले बस्ती घेरिएको छ। पाखो चिराचिरा परेको छ भने घरका पर्खालसमेत सुरक्षित छैनन्”, उनले भने, “त्यसैले खानीगाउँ र ताङवाङका बासिन्दा सुरक्षित ठाउँमा आएर अस्थायी टहरा बनाएर बसेका छन्।”

बाढी प्रभावितमध्ये अन्यत्र घर नभएका र आफैँ बसोबासको व्यवस्था गर्न नसक्ने परिवारलाई अस्थायी शिविरमा राखिएको छ।

गाउँपालिकाले प्रभावित परिवारलाई राहत उपलब्ध गराउनुका साथै अल्पकालीन र दीर्घकालीन पुनःस्थापनाको योजना अघि बढाएको अध्यक्ष राजुप्रसाद आचार्यले बताए।

“तत्कालका लागि जस्तापाता, भाँडाकुँडा, लत्ताकपडा र खाद्यान्न उपलब्ध गराएर अस्थायी टहरा बनाई बसोबासको व्यवस्था मिलाउने योजना छ”, उनले भने, “दीर्घकालीन रूपमा सरकारको नीतिअनुसार निजी आवास र क्षतिग्रस्त भौतिक संरचनाको पुनर्निर्माण गर्नेछौँ।”

अध्यक्ष आचार्यका अनुसार निजी आवाससँगै क्षतिग्रस्त सडक, खानेपानी, सिँचाइ र विद्यालय भवन पुनर्निर्माण गर्नुपर्नेछ। जोखिममा रहेका बस्तीको संरक्षण र बाढीपहिरो नियन्त्रणका लागि आवश्यक स्रोत जुटाउन सङ्घीय तथा प्रदेश सरकार र दातृ निकायसँग समन्वय भइरहेको उनले बताए।