दसैँमा थरिथरि पिङ, कतै चहलपहल त कतै पिर्कासमेत छैनन्

धादिङ । दसैँको आगमनसँगै गाउँगाउँमा रोटे, चर्खे र लिङ्गे पिङ हाल्ने चलन छ। तर यस वर्ष धादिङ, नुवाकोट र रसुवाका कतिपय ठाउँमा पिङको रौनक विगतमा जस्तो छैन।

Watch On

धादिङको सिरानबजार, इजारा, मुरलीभञ्ज्याङ, पाल्पाभञ्ज्याङ र हुलाकभञ्ज्याङमा विभिन्न प्रकारका पिङ देखिन्छन्। पिङ भएका ठाउँमा बालबालिका पालो पर्खँदै, पिङ खेल्दै र एकअर्कालाई मच्चाउन सहयोग गर्दै गरेको देखिन्छ।

तर अघिल्ला वर्षमा रोटे र चर्खे पिङ हालिएका कतिपय ठाउँमा यसपालि पिर्कासमेत राखिएको छैन। केही पिङ प्रयोगविहीन छन्।

भोटेकोशी र बुढीगण्डकीमा आएको बाढीले ठूलो जनधनको क्षति पुर्‍याएपछि प्रभावित क्षेत्रका बासिन्दामा दसैँको उल्लास कम देखिएको छ। वर्षको एकफेर भुइँ छाड्नुपर्ने चलन भए पनि बाढीको कहरले त्यो उल्लास छोपिएको स्थानीय बताउँछन्।

गाउँमा युवाको सङ्ख्या घट्दै जानु र बालबालिका मोबाइलमा बढी व्यस्त हुनुले पनि पिङप्रतिको आकर्षण घट्दै गएको उनीहरूको भनाइ छ।

नीलकण्ठ नगरपालिका–३, धादिङका कृष्णबहादुर पाठक गाउँमा पहिलेको जस्तो चहलपहल नरहेको बताउँछन्।

“पहिलेजस्तो गाउँमा युवा छैनन्। भएकाहरू पनि आफ्नै तालमा खाने–खेल्ने गर्छन्। बालबच्चा मोबाइलमै व्यस्त हुन्छन्। पिङतिर आउने, रमाउने भन्ने चलन नै हराउन थाल्यो”, उनले भने।

तस्बिर : शंकर श्रेष्ठ/नेपाल फोटो लाइब्रेरी