एनटी फाइबरको प्याकेजमा आकर्षण, अनलाइनबाटै जडानको अनुरोध गर्न सकिने

काठमाडौँ । नेपाल टेलिकमको एनटी फाइबर इन्टरनेट प्याकेजप्रति ग्राहकको आकर्षण बढेको छ। नयाँ लाइन जडानबारे जानकारी लिन १९८ नम्बरमा सम्पर्क गर्ने ग्राहकको चाप बढेपछि टेलिकमले उक्त नम्बरको क्षमता वृद्धि गरेको छ।

Watch On

टेलिकमका अनुसार एनटी फाइबर जडान गर्न इच्छुक ग्राहकले १९८ नम्बरमा फोन गरेर आफूलाई पायक पर्ने स्थानमा सेवा उपलब्ध भए–नभएको जानकारी लिन सक्छन्। नम्बरको क्षमता बढाएपछि ग्राहकलाई जानकारी लिन र जडान प्रक्रिया अघि बढाउन सहज हुने कम्पनीको अपेक्षा छ।

ग्राहकले एनटी फाइबर जडानका लागि अनलाइनबाटै अनुरोध गर्न सक्ने व्यवस्था पनि गरिएको छ। यसका लागि नेपाल टेलिकमको अनलाइन प्रणाली मा लगइन गरी आफ्नो नेपाल टेलिकम मोबाइल नम्बर प्रयोग गरेर आवश्यक विवरण पेस गर्न सकिनेछ। यही प्रणालीबाट सेवासम्बन्धी गुनासोसमेत दर्ता गर्न सकिने कम्पनीले जनाएको छ।

टेलिकमले हालै एनटी फाइबरअन्तर्गत चार हजार ९९९ रुपैयाँमा ३० एमबीपीएस गतिको इन्टरनेट प्याकेज उपलब्ध गराएको छ। ग्राहकको आवश्यकता र प्रयोगअनुसार अन्य प्याकेज पनि उपलब्ध छन्।

इन्टरनेटको शुल्क, गति र गुणस्तरका आधारमा सेवा प्रदायकका प्याकेज तुलना गर्ने प्रवृत्ति बढिरहेका बेला तुलनात्मक रूपमा कम शुल्कमा इन्टरनेट सेवा लिन चाहने ग्राहक एनटी फाइबरतर्फ आकर्षित भएको कम्पनीको भनाइ छ।