सुन प्रकरणमा दावा पत्नी अमला फरार प्रतिवादी, विदेश भागेको आशंका

२७ भदौ काठमाडौं । ६० किलो सुन प्रकरणमा माओवादी नेताहरुसँग नजिक देखिएकी दावा पत्नी अमला रोकाको पनि संलग्नता पुष्टि भएको छ । नेपाल प्रहरीको केन्द्रिय अनुसन्धान ब्यूरो सीआईबीले उनलाई पनि प्रतिवादी बनाएर मुद्दा दर्ता गर्नु पर्ने राय सहित जिल्ला सरकारी वकिललाई प्रतिवेदन बुझाएको छ । 

Watch On

ठमेलको भियना होटलकी सञ्चालक समेत रहेकी अमला, सुन प्रकरणका नाइके मानिएका बेल्जिएम दावा छिरिङ पत्नी हुन् । साथै उनि माओवादीका उपमहासचिव वर्षमान पुनकी चेली समेत हुन् । वर्षमानका भाई प्रनेश पुन र दावा पत्नी अमला सुन उत्खनन् तथा प्रसोधन गर्ने कम्पनी भियना मल्टीप्रपोजको व्यापारिक साझेदार समेत हुन् । 

२०६३ पछि अल्लो, भाँगो बेच्न काठमाडौं आएकी अमलाको अहिले सुन उत्खनन् तथा प्रशोधन गर्ने कम्पनी देखि होटल, र भियना क्यासिनोसम्ममा लगानी छ । साथै सुन प्रकरणमा दावा छिरिङसँग सम्बन्ध देखिएको बिध ल्यावका सञ्चालक भिमकान्त भण्डारीसँग पनि अमलाको व्यापारिक साझेदारी देखिएको छ । भण्डारीको बिध अटोमोवाइल्समा अमलाको पनि शेयर रहेको पाइएको छ । 

EXCLUSIVE : शहिद परिवारको भत्ता खाने दावा पत्नी अमलाको अटोमोबाइल्सदेखि क्यासिनोसम्म लगानी

साउन १४ गते राजश्व अनुसन्धान विभागले दावालाई पक्राउ गरेपनि अमलालाई नियन्त्रणमा लिएको थिएन । दावा पक्राउ परेको केही दिनपछि पुर्वउपराष्ट्रपति तथा माओवादी नेता नन्दबहादुर पुनसँग भेटेको भिडियो पोष्ट गरेकी अमला अहिले भने नेपाल प्रहरीको फरार सूचीमा रहेकी छिन् । 

सीआईबी प्रमुख एआइजी किरण बज्राचार्यका अनुसार दावा पक्राउ परेको भोलिपल्टबाटै उनको फोन स्विच अफ भएको छ । अहिले उनले नेपाल छोडिसकेको देखिएको छ । उनले दावाको समुहले हङकङ र चीनबाट ल्याउने सुन व्यवस्थापनमा दावालाई सहयोग गर्दै आएकी थिइन् । उनिहरुकै व्यवस्थापनमा रेडी ट्रेडबाट मात्रै ३०२ किलो ६२ ग्राम सुन तस्करी भएको छ । 

अमला पक्राउ परेपछि सुन तस्करीका लागि आयात भएको मेसिनदेखि राजनीतिक दलका नेताहरुको कनेक्सन स्पष्ट हुने सीआईबीको दाबी छ ।