"युवाले गाउँ छाेडे,गाउँमा भएकाले क्षेत्री बाहुनकाे शव बाेक्न संस्कारले दिदैन भने "

काठमाडौं । आइतबार बिहान सिन्धुली तीनपाटन गाउँपालिका ७ ताेस्रामखाेला कि कृष्णा पहाडीकाे ६५ वर्षको उमेरमा बिहान साँढे ७ बजे निधन भयो । मृगौला र फाेक्साेकाे बिरामीका कारण लामो समयदेखि थलिएकी उनकाे स्वास्थ्य अवस्था केहिदिन देखि थप जटिल बनेकाे थियो ।

Watch On

श्रीमान् नभएकी कृष्णाकाे छाेरा राजु पहाडी काठमाडौं बस्थे । आमाको स्वास्थ्य गंभिर भएपछि छिमेकीले छाेरालाई घर आउन खबर गरे । आमाकाे स्वास्थ्य बिग्रिएकाे खबरले छाेरा ३ दिन अघि घर आइपुगे तर आइतबार आमाकाे निधन भयो । 

मृतक आमाको अन्तिम संस्कार गर्न घाट जाने मान्छे भएनन् । छिमेकीले आफ्नै थरका तर अलिपरका युवराज पहाडीलाई घाट जानका लागि आइदिन खबर गरे । निर्वाचित वडा अध्यक्षसमेत रहेका युवराज आफ्नो भाइ ताेयनाथलाई लिएर राजुकाे घर पुगे । 

मगर र दलित बस्तीको बीचमा रहेको पहाडीहरुकाे ५/६ घर मध्येको एक प्राण परेकाे घरमा सबै मानिस जम्मा त भएका थिए तर त्यहाँ घाट जाने र शव बाेक्ने मान्छे भएन । आमाको प्राण पखेराे उँडेकाे छेउमा बसेका राजुलाई साक्षी राखेर वडाअध्यक्ष युवराजले शव बाेकेर घाटमा गइदिन छर छिमेकीलाई आग्रह गरे । तर,स्थानीय दलित र मगर जनजातिले मलामी जाने तर शव नबाेक्ने बताए । ताेस्रामबाट अन्तिस दाहसंस्कार गर्ने घाट बसुखाेला पुग्न हिंडेर कम्तिमा डेढ घण्टा लाग्छ । "छाेरा राजु,म, मेराे भाइ ताेयनाथ र एकजना छिमेकी मनमाया अधिकारी दिदी मात्रै भयाैँ"  युवराजले सिधाकुरासँग भने, " हामी जम्मा ४ जनाले मात्रै शव घाटमा पुर्‍याउन सकिने अवस्था थिएन । मैले सबै कुराकाे जिम्मा लिन्छु शव बाेकाैँ भने तर कसैले मानेनन् ।  पुरानो संस्कार भन्दै बरु मलाम जाने शव नबाेक्ने अडान पछि हामी ४ जना शव बाेकेर घाट लाग्यौं ।"

वडाअध्यक्ष पहाडीकाअनुसार गाउँलेहरु ट्याक्टरमा दाउरा बाेकेर त आए तर शव बाेकेनन् । डेढ घण्टाकाे बाटाे आमाको दाहसंस्कारका लागि छाेरा राजु, छिमेकी युवराज र उनका भाइ ताेय अनि अर्की छिमेकी मनमाया घाट निश्किए । घरबाट निश्किने बेला छाेरा राजु र वडाअध्यक्षले शव काँध हाले । मनमायाले मृतककाे कपडा बाेकिन मलामी घाट लागे । लामाे बाटाे र कठिन यात्राका बाबजुत राजु, युवराज र ताेयनाथ थाके । उनीहरुलाई मलामीमा कठिन भएपछि मनमायाले शव काँध हाल्ने प्रस्ताव गरिन । युवराज, ताेय र छाेरा राजुले नाई भनेनन् ।

एक महिला र तीन पुरुष भएर घाट पुगेर दाहसंस्कार गरे ।  "हामी आज युवाबिहिन समाज, संकटकाे घडी  र परम्परागत संस्कारकाे  सिकार भयाैँ" मलामीकाे थकान बिसाउँदै गरेका वडा अध्यक्ष पहाडीले सिधाकुरासँग भने," समाजकाे याे दुरावस्था काेही कसैलाई भाेग्नु नपराेस् । "