जुँगाको लडाइँ उपेन्द्र र प्रदीप यादवको, २१० क्विन्टल धानमा आगाे लाग्याे हरिन्द्रको

वीरगंज । गत पुष ६ गते पर्साको वीरगंज महानगरपालिका २२ जगरनाथपुरमा जनता समाजवादी पार्टी (जसपा) ले आफ्नो अभिमुखीकरण कार्यक्रम गर्यो । 

Watch On

सो कार्यक्रममा पार्टीका अध्यक्ष उपेन्द्र यादव सहभागी भए । यसअघि कुनै पार्टीमा नलागेका हरिन्द्र यादव पछिल्लो समय जसपा नेपाल प्रवेश गरेर वडा २२ का वडा अध्यक्षका प्रत्यासी मनोज ठाकुरलाई सघाइरहेका छन् । मनोज र हरिन्द्रका मिल्ने साथी पनि हुन् । 

नयाँ प्रवेशी पार्टीको जनमत बटुल्न तथा पार्टीको अभिभुखिकरण कार्यक्रमका लागि उनले आफ्नै जग्गामा कार्यक्रम आयोजना गराएका थिए । 

कार्यक्रमको पूर्वतयारी गर्दै गर्दा आफूलाई कार्यक्रम अघि नै खानेपानी मन्त्री प्रदीप यादवका कार्यकर्ता नरेश यादवले ह्वाट्सएपमा फोन गरेर प्रदिप यादवको विषयमा कुनै पनी टिका टिप्पणी नगर्न धम्की दिएको मनोजको आरोप छ । 

त्यसो त उपेन्द्र सहभागी हुने कार्यक्रम अघि नरेशको समूहले विभिन्न पोलमा झुन्ड्याइएको नेपालको झण्डा समेत हटाइदिएको हरिन्द्रको आरोप छ । 

यति गर्दा पनि कार्यक्रम केही असर नपरेपछि जगरनाथपुरका स्थानीयको घर घरमा गएर कार्यक्रममा नजान आग्रह समेत गरेको मनोज बताउँछन् ।

दिनभरको राजनीतिक दाउपेचका बीच कार्यक्रम सम्पन्न भयो । तर, रातीको ११ बजे हरिन्द्रको साढे तीन बिघा धानबालीमा आगलागी भयो । 

साढे तीन बिगाहा जग्गाको धानको कुनिउँ (एक ठाउँमा जम्मा गरी दाइ गर्न राखिएको परालसहितको धान) मा डिजेल र पेट्रोल छर्केर आगो लगाइएको हरिन्द्र यादवले सिधाकुरालाई बताए ।

‘यादवको कार्यक्रम बिथोल्न नसकेर झण्डै १ हजार १२० बोझा खलियानमा थुपारेको करिब साढे ७ लाख रुपैयाँ बराबरको २ सय १० क्विन्टल धानमा डिजल पेट्रोल छर्केर नष्ट गरिएको छ’ हरिन्द्रले भने । 

रातको समयमा थुपारिएको धानमा डिजेल पेट्रोल छर्केर आगजनी गरिदिएर मिसन कम्प्लिट भनेर फेसबुकमा प्रतिशोधपूर्ण स्ट्याटस् लेखिएको पनि हरिन्द्रको दाबी छ ।

‘कार्यक्रम गर्ने कुरा थाहा पाएपछि मन्त्री पक्षले धम्की दिएको थियो । मैले जमिन उपलब्ध गराएको रिसले मेरो धानमा आगो लगाइदियो,’ उनले भने । 

घटनापछि जिल्ला प्रहरी कार्यालय पर्सामा पीडित किसान हरिन्द्र यादवले उजुरी दिएका छन् । उजुरी दिएको ५ दिन वितिसक्दा पनी हालसम्म कसैलाई अनुसन्धानको दायरामा ल्याइएको छैन् । धान जलाइएको प्रकरणमा प्रहरीले अनुसन्धान गरिरहेको पर्साका प्रहरी प्रमुख उपरीक्षक कुमाेद ढुंगेलले बताए ।   

घटनाको भोलिपल्ट जसपा नेपालका अध्यक्ष उपेन्द्र यादवले प्रहरी उपरिक्षक ढुंगेललाई बोलाएर समेत सत्यतथ्य छानविन गर्न आग्रह गरेका थिए । 

घटनापछि जसपा नेपालले पत्रकार सम्मेलन गर्दै घटनाको छानबिन र दोषीलाई कारबाही गर्न माग गरेको छ । जसपा पर्साका जिल्ला अध्यक्ष रामनरेश यादवले सत्यतथ्य छानविन गरी आगजानी लगाउने व्यक्तिहरुलाई पक्राउ नगरे कडा आन्दोलन गर्ने चेतावनी दिए । 

जसपाले पत्रकार सम्मेलन गरेको दुई घण्टा नवित्दै जनता समाजवादी पार्टी वीरगंज महानगर कार्यसमितिले विज्ञप्ति जारी गरेर  जसपाले प्रदीप यादवको बदनाम गरेको आरोप लगायो ।  

‘कृषक हरिन्द्र यादवलाई गुमराहमा राखेर जसपा नेपालका जिल्ला अध्यक्ष रामनरेस यादवले खानेपानी मन्त्री तथा जसपाका उपमहासचिव प्रदिप यादवको बदनाम गराउने दुष्प्रचार गरेको पाइयो,’ विज्ञप्तिमा भनिएको छ, ‘विना कुनै तथ्य र प्रमाण बिना मनगढन्ते रुपमा कसैलाई आरोप लगाउनु निन्दनीय कार्य हो । यस्तो कार्य जो कोहीबाट भए पनि त्यसको हामी कडा प्रतिवाद गर्नेछौँ,’ अध्यक्ष इश्वरचन्द्र यादवद्वारा जारी गरिएको विज्ञप्तीमा भनिएको छ ।

यता मिशन पुरा भएको स्ट्याटस लेख्ने नरेश यादवले भने आफूहरुले सो राजनीतिक कार्यक्रममा २ सय मानिस सहभागी हुनबाट रोकेको विषया फेसबुकमा लेखेको दाबी गर्छन् । राजनीतिक रुपमा आफूहरु सफल भएको कुरा लेखेको तर त्यसलाई धानसँग जोडिएको उनको दाबी छ । 

‘२ हजार मान्छे जम्मा हुने भनिएको कार्यक्रममा २ सय मानिस पनि सहभागी भएनन्,’ यादवले दाबी गदै भने,‘त्यही सफलताको खुसीयाली मनाएको हो । तर धान जलाएको आरोप लगाएछन् । यो गल हो । झुट हो ।’ उनले धान जलाएको विषमा निश्पक्ष छानबिन गर्न पनि प्रशासनसँग माग गरे ।