ज्ञानेन्द्र शाहीलाई रघुजी पन्तले भने– जुम्लामा हाहु गरेजस्तो हैन, बहस गर्ने भए इतिहास पढेर आउने

काठमाडौँ । नेकपा एमालेका सांसद रघुजी पन्तले ज्ञानेन्द्र शाहीलाई इतिहास पढ्न सुझाएका छन् । संसदमा राजालक्षित अभिव्यक्ति दिँदै गर्दा राप्रपा सांसद शाहीले उठेर नियमापत्ति जनाएपछि उनले सो अभिव्यक्ति दिएका हुन् ।

Watch On

संसदमा पन्तले संविधानले राजतन्त्रलाई नचिन्ने भएकाले संसदमा यस बिषयमा बहस गर्न उचित नभएको बताएका थिए । विभिन्न इतिहासका घटना प्रस्तुत गर्दै उनले राजतन्त्रको कालखण्डमा घटेका विभिन्न घटनाले नेपालको भविष्यलाई अन्धकारमय बनाएको गरेका थिए ।  राजतन्त्रको कालखण्डका दृष्टान्त प्रस्तुत गरेपछि राप्रपा सांसद ज्ञानेन्द्र शाहीले आपत्ति जनाएका थिए । आफ्नो अभिव्यक्तिप्रति शाहीले आपत्ति जनाएपछि सांसद पन्तले आफ्नो समयमा बोल्न र इतिहास पढेर आउन सुझाव दिए । 

उनले भने, ‘मसँग बहस गर्ने भए इतिहास पढेर आउने मिस्टर । जुम्लामा हाहु गरेर आएजस्तो हैन । इतिहास पढेर आउ ।’, पन्तले ठूलो स्वर गर्दै भने ।

२ जनाबिचको भनाभन चलेपछि सभामुखले आफूले ज्ञानेन्द्र शाहीलाई बोल्न समय नदिएको भन्दै बस्न आग्रह गरे । सभामुखको पटकपटकको आग्रहपछि सांसद शाही बसे भने पन्तले आफ्नो अभिव्यक्तिलाई निरन्तरता दिए । 
त्यस्तै सांसद पन्तले पूर्वविशिष्टहरुलाई आजीवन सुविधा दिनेगरि कानून बनाउन खोजिएको बिषयमा भएका चर्चाको मन्त्रीहरुले सदनमा जवाफ दिनुपर्ने बताए । जनताको भावनालाई नबुझ्ने र प्रधानमन्त्रीलाई नटेर्ने मन्त्रीहरुलाइ सरकारमा राखिरहन आवश्यक नरहेको उनले बताए । उनले अहिलेको अवस्थामा मन्त्रीहरु फेर्ने अवस्था आएको जिकिर गरे ।