ट्राफिक प्रहरीले युवक कुटेको अर्को भिडियो पनि भाइरल

काठमाडौँ । ट्राफिक प्रहरीले एक युवकलाई लखेटेर कुटपिट गरेको अर्को भिडियो पनि भाइरल भएको छ । 

Watch On

सो भिडियोमा एक युवक हातमा हेलमेट लिएर कुदिरहेको देखिन्छ भने उनलाई एक ट्राफिक प्रहरीले लेखेटिरहेको देखिन्छ । ती युवकले किन कुटेको भन्दै भागेको सार्वजनिक भएको भिडियोमा देखिन्छ भने लखेट्ने ट्राफिक प्रहरीले किन भागेको भन्दै ती युवकको कठालो समाएर कुटपिट गरेको देखिन्छ । 

त्यस्तै ती युवकलाई ती ट्राफिक प्रहरीले भागेको दिशातिर फर्काउँदै लात्ती बजारेको समेत देखिन्छ । 

शुक्रबार बिहानदेखि सामाजिक सञ्जालमा भाइरल भइरहेको सो भिडियो कहाँको हो भन्ने एकिन भइसकेको छैन् । यस विषयमा उपत्यका ट्राफिक प्रहरी कार्यालयले आफूहरुकहाँ भिडियो आएको र सो भिडियोको वास्तविकता बुझ्ने प्रयास भइरहको बताएको छ । 

त्यसो त बिहिबार पनि एक ट्राफिक प्रहरीले एक युवकलाई मरणासन्न हुने गरि कुटपिट गरेको घटना बाहिरिएको थियो । भिडियो भाइरल भएपछि  काठमाडौँ उपत्यका ट्राफिक प्रहरी कार्यालय त्यसमाथि अनुसन्धान सुरु गरेको थियो । प्रहरीको प्रारम्भिक अनुसन्धानका क्रममा युवकमाथि ट्राफिक प्रहरीले कुटपिट गरेको सो घटना मंसिर २३ गते सुन्धारा आकाशे पुलमुनि भएको खुलेको छ । 

कुटपिटमा संलग्न एक ट्राफिक प्रहरीसहित अन्य ४ जना ट्राफिक प्रहरी वृत्त जनसेवामा कार्यरत रहेको र उनीहरुलाई जिम्मेवारीबाट हटाएर अनुसन्धानका लागि काठमाडौँ उपत्यका ट्राफिक प्रहरी कार्यालय तानिएको ट्राफिक प्रहरी कार्यालयले जनाएको छ ।