एभरेष्ट अस्पतालका लापरवाही कारण गोठाटारकी मनिता शर्माको मृत्यु भएको भन्दै नेपाल मेडिकल काउन्सिलमान दिएको उजुरी माथिको छानबिनमा काउन्सिलको भुमिकानै शंकास्पद देखिएको परिवारले गुनासो गरेका छन् । 

मनिताको उपचारमा एभरेष्ट अस्पताल र चिकित्सक डा. ज्योत्सना शर्मा गम्भिर नहुँदा, मनिताको ज्यान गयो भन्दै उनका श्रीमान सुवास पराजुलीले छानबिन गरि कारबाहीको माग गर्दै २०८१ पुस २९ गते नेपाल मेडिकल काउन्सिलमा उजुरी दिएका थिए । तर ४ महिना बढी भैसक्दा पनि उनको उजुरी माथि छानबिनको निष्कर्श आएको छैन । 

२ वर्षदेखि एभरेष्ट अस्पतालमा डा.ज्योत्सना शर्मासँग नियमित परिक्षण तथा उपचार गराइरहेकी मनिता शर्माको मंसिर २५ गते प्रसुतका लागि शल्यक्रिय भएको थियो । शल्यक्रिया गरेपछि उनको अवस्था बिग्रिएको थियो । करिब २४ घण्टा एभरेष्ट अस्पतालमा रहँदा उनको शरिरका सबै अंगले काम गर्न छाडिसकेको अस्पतालकै रिपोर्टबाट देखिएको थियो । तर उनलाई ह्याम्स अस्पताल लगिसकेपछि मात्रै हेल्प सिन्ड्रम र इक्लेम्सीयाका समयमा उपचार नहुँदा ज्यान गएको चिकित्सकहरुले बताएका थिए । 

तर डा.ज्योत्सनाले भने नियमित परिक्षण गर्दा मात्रै होइन, अवस्था चित्नाजनक हुँदा पनि मनिताको वास्तविक स्वास्थय अवस्था बारे परिवारलाई जानकारी नगराएको परिवारले गुनासो गर्दै आएका थिए । साथै अस्पतालले मृतकका परिवारलाई दिएको विवरण, अस्पतालको कन्टिनियस सिट तथा  चिकित्सकले संचारमाध्यमा दिएको अभिव्यक्ती समेत फरक फरक देखिएको छ । 

अस्पतालका फरक फरक रिपोर्ट, चिकित्सकको अभिव्यक्ति सहित उजुरी दिएपछि सुवास उजुरीको अपडेट लिन नियमत जसो काउन्सिल पुग्ने गरेका छन् । तर जवाफ आज र भोलीमा मात्रै सिमित भएको छ । 
केहि दिन अघि पनि नेपाल मेडिकल काउन्सिलले डा विश्व दवाडीको नेतृत्वमा छानबिन टोली बनाएको थियो । तर छानबिन टोलीले मृतकका परिवारसँग जाहेरी बाहेक कुनै सोधपुछ नगरेको मृतक श्रीमान सुवास बताउँछन् । साथै उनीहरुले आरोपित चिकित्कलाई समेत बयानका लागि काउन्सिलमा बोलाएका थिए । 

आफ्नो बयान लिइदिन भन्दै सुवास, नेपाल मेडिकल काउन्सिलका रजिष्ट्रार देखि काउन्सिलका अध्यक्ष प्रध्यापक डा चोपलाल भुषाललाई समेत भेटेका थिए । भेटका क्रममा भुषालले उजुरी र अस्पतालका केहि विवरण हेर्दा अस्पतालको लापरवाही भएको तथा चिकित्सकले तफृबाट परिवारलाई वास्तविकता जानकारी नदिइएको लगायतका कमजोरी भएको बताएका थिए । मृतक परिवारले यसको प्रमाण सुरक्षीत राखेका छन् । यस विषयमा निष्पक्ष छानबिन हुने आश्वासन उनले दिएका थिए ।

तर मृतकका आफन्तको जाहेरी र एभरेष्ट अस्पतालको एउटा लिखिरत जवाफलाई मात्रै आधार बनाएर मेडिकल काउन्सिलले निर्णय गर्न लागेको पराजुलीलाई काउन्सिलकै कर्मचारीले केही दिन अघि जानकारी गराएका छन् । 
आफूलाई एक पटक पनि छानबिन टोलीले नभेटी, केहि नसोधी रिपोर्ट निकाल्न थालिएपछि सुवासले सामाजिक संजालमा नेपाल मेडिकल काउन्सिलको शंकास्पद भूमिका बारे भिडियो सार्वजनिक गरे । 

भिडियोमा सुवासले नेपाल मेडिकल काउन्सिलले निष्पक्ष अनुसन्धान नगरेको गुनासो गरेका थिए । काउन्सिलले डा विश्व दवाडीको नेतृत्वमा गठित टोलीले वास्तविकता ढाकछोप गर्ने तरिकाले एकतर्फ मात्रै रिपोर्ट दिन लागको भन्दै आशंका व्यक्त गरेका थिए । 

साथै सुवासले नेपाल मेडिकल काउन्सिलका अध्यक्ष डा भुषाल, डा विश्व दवाडी  अस्पताल तथा चिकित्सकका तर्फबाट प्रभावित भएको आरोप लगाएका थिए । सुवासका अनुसार काउन्सिललाई आरोपित डाक्टर शर्माका श्रीमान् डा सन्जिव तिवारीले विभिन्न शक्ती केन्द्र धाएर तथा काउन्सिलका अध्यक्ष भुषालसँग भेटेर प्रभावित बनाएको बताएका छन् । नेपाल मेडिकल एशोसियनका महासचिव समेत रहेको डा तिवारले पेशा र पदको दुरुपयोग गर्दै काउन्सिललाई प्रभावित बनाएका छन् । 

साथै सुवासका अनुसार अस्पतालले मनिताको मृत्युपछि ह्याम्स अस्पतालमा पठाइएको डकुमेन्ट, उनले आफूले प्राप्त गरेको डकुमेन्टसँग अस्पताले काउन्सिलमा बुझाएको विवरण परीक्षण समेत नगरेको बताए ।  साथै अस्पतालको सिसिटिभ परिक्षणका लागि समेत काउन्सिलमा लेखेर दिदाँ समेत परिक्षण नगरिएको बताए । 

साथै सुवासले अस्पतालका दिपक बरालसँग भेट गर्दा समेत उनले चिकित्सकले परिवारलाई वास्तविकता जानकारी नगराएको बताएका थिए । यसको प्रमाण सुवासले सुरक्षीत राखेका छन् । सुवासले मेडिकल काउन्सिलले चिकित्सक र अस्पताललाई जोगाउन तरिकाले निर्णय गर्न लागेको भन्दै काउन्सिलका अध्यक्ष डा चोपलाल भुषाल लगायतलाई होसियारी समेत गराएका छन् । 

यस विषयमा हामीले मेडिकल काउन्सिलका अध्यक्ष डा चोपलाल भुषाललाई जानकारीका लागि सम्पर्क गर्दा उनको फोन उठेन । साथै उनलाई घटना विवरण र समाचार प्रयोजनको विषय खुलाएर जवाफ मागेको म्यासेज समेत जवाफ फर्काएनन् । यस विषयमा हामीले डा विश्व दवाडीलाई पनि सम्पर्क गरेका थियौँ तर उनले फोन उठाएनन् । 

सुवासका अनुसार मनिता शर्माको उपचारमा भएको लारपवाहीका विषयमा सुवासले स्वास्थ्य मन्त्रालयमा समेत जानकारी गराएका थिए । स्वास्थय मन्त्री प्रदिप पौडेललाई नै घटनाको विषय जानकारी गराएपनि उनले एक कल गरे काउन्सिलमा छिटो अनुसन्धान गर्न भनेका थिए । 

तर स्वास्थ्य मन्त्रालयबाट केहि साता अघि मात्रै अवकाश प्राप्त सचिव डा रोशन पोखरेलनै एभरेष्ट अस्पतालको कोर टिममा रहेका छन् । पोखरेलकै आवद्धता रहेका कारण स्वास्थ्य मन्त्रालयले समेत एभरेष्ट अस्पतालमा विषयलाई ढाकछोप गर्न लागेको छ । एभरेष्ट अस्पतालको वेबसाइटमा उल्लेख भएअनुसार डा.पोखरेल अस्पतालको एनेस्थेसियोलोजीका प्रमुख हुन् । 

मनिता शर्मा र एभरेष्ट अस्पताल प्रकरणमा हामीले यस अघि ३ वटा श्रृङ्खलामा विस्तृत रिपोर्टीङ गरेका थियौँ । त्यस क्रममा मनिताका श्रीमान सुवास पराजुलीको हात पारेको अस्पतालका मेडिकल रिपोर्ट र कन्टिन्युएसन सिटमा देखिएको विवरण अनुसार मनिताको उपचारमा एभरेस्ट अस्पताल गम्भीर नभएको देखिने आधारहरु भेटिएका थिए । 

यसअघिका समाचारहरु:

मनिता शर्मा मृत्यु प्रकरणः एभरेष्ट अस्पतालले सिसिटिभि फुटेज लुकायो, निर्देशकले कमजोरी स्वीकारे

एभरेस्ट अस्पताल प्रकरणः अस्पतालकै विवरणले देखाउँछ लापरवाहीको आधार

काखमा छोरी, साथमा छैनन् मनिताः न्याय माग्दै भौतारिइरहेछन् सुवास