काठमाडौँ महानगरका पूर्व इन्जिनियर रामबाबु महतोविरुद्ध भ्रष्टाचार मुद्दा दायर

काठमाडौँ । काठमाडौँ महानगरपालिकाका तत्कालीन इन्जिनियर रामबाबु महतो कोईरीविरुद्ध भ्रष्टाचार मुद्दा दायर भएको छ। अख्तियार दुरुपयोग अनुसन्धान आयोगले महतोले सार्वजनिक सेवामा रहँदाको अवधिमा गैरकानुनी रूपमा अकूत सम्पत्ति आर्जन गरेको अभियोगसहित विशेष अदालतमा मुद्दा दायर गरेको हो।

Watch On

महतोले २०४६ सालदेखि २०७८ सालसम्म काठमाडौँ महानगरपालिकामा कार्यरत रहँदा ठूलो परिमाणमा अकुत सम्पत्ति आर्जन गरेको अख्तियारको दाबी छ। महतोको वैध आम्दानी ३ करोड ३७ लाख ७९ हजार रुपैयाँ मात्र देखिएको छ भने उक्त अवधिमा उनले करीब ७ करोड ९६ लाख रुपैयाँ बराबरको सम्पत्ति र खर्च गरेको पाइएको आयोगले जनाएको छ । 

महतोले ४ करोड ५८ लाख ९७ हजार रुपैयाँ बढी भ्रष्टाचारबाट कमाएको आयोगले जनाएको छ । उनका बैंक स्टेटमेन्ट, चेक भौचर, जग्गा खरिद कागजात, बीमा, विद्यालय शुल्क, सहकारी तथा कम्पनी कारोबारलगायतका विवरणहरू अध्ययन गर्दा उनले गैरकानुनी ढङ्गले आयआर्जन गरेको आयोगले जनाएको छ । त्यस्तै उनले आफ्नो पदीय हैसियतको दुरुपयोग गरी अस्वाभाविक रूपमा उच्च जीवनस्तर यापन गरेको आयोगले जनाएको छ।
त्यस्तै उनले स्रोत नखुलेको रकमबाट श्रीमती माला कुमारी महतोका नाममा जग्गा, घर, शेयर तथा बैंक मौज्दात राखिएको पाइएको छ। आयोगले ती सम्पत्तिहरू पनि गैरकानुनी आर्जन मान्दै जफतको माग गर्दै माला कुमारी महतोलाई समेत प्रतिवादी बनाएको छ।