मनिताको न्यायको कामना गर्दै नेपाल बैंकका कर्मचारीको शोक सभा

काठमाडाैँ । बानेश्वरको एभरेस्ट अस्पतालमा उपचारपछि मृत्यु भएकी गोठाटारकी मनिता शर्माको सम्झनामा नेपाल बैंक केन्द्रीय कार्यालयका कर्मचारीले शाेक सभा आयोजना गरेका छन् । 

चिकित्सक र अस्पतालको लापरबाहीको कारण मनिताको मृत्यु भएको भन्दै उनका न्यायको कामना गर्दै उनको जन्मदिनको मिति पारेर नेपाल बैंकका कर्मचारीले शोक सभा गरेका हुन् । 

केन्द्रीय कार्यालयमा आयोजित शोक सभामा मनिताको मृत्यु प्रकरणमा अस्पताल र चिकित्सकमाथि निष्पक्ष छानबिन गरी दोषी उपर कारबाही गर्न माग गरेका थिए । 

नेपाल बैंकमा १२ वर्षदेखि कार्यरत मनिता, पछिल्लो समय केन्द्रीय कार्यालयमा उपप्रबन्धकका रुपमा कार्यरत रहेकी थिइन् । 

काखमा छोरी, साथमा छैनन् मनिताः न्याय माग्दै भौतारिइरहेछन् सुवास

प्रसुतीका लागि मंसिर २५ गते बानेश्वरको एभरेस्ट अस्पतालमाा पुगेकी उनको उपचारमा डा ज्योत्सना शर्मा खटिएकी थिइन् । २ वर्षदेखि डा शर्माको नियमित चेकजाँचमा रहेकी मनिताको शल्यक्रिया पछि छोरी जन्मिएकी थिइन् । तर मनिताको स्वास्थ्य अवस्था भने झन् गम्भीर भएपछि ह्याम्स अस्पताल रेफर गरिएको थियो । ह्याम्स अस्पतालले एभरेस्ट अस्पतालबाट रेफर भएर आउँदा नै मनिताको  शरीरका धेरै अङ्गले काम गर्न छोडिसकेको जनाएको थियो । त्यसको केही दिनमा मनिताको मृत्यु भएको थियो । 

मनिता शर्मा मृत्यु प्रकरणः एभरेष्ट अस्पतालले सिसिटिभि फुटेज लुकायो, निर्देशकले कमजोरी स्वीकारे

मनिताको उपचार संलग्न एभरेस्ट अस्पताल र चिकित्सक डा ज्योत्सना शर्माको लापरबाहीका कारण उनको मृत्यु भएको भन्दै मनिताका श्रीमान् सुवास पराजुली न्यायको खोजीमा भौँतारिरहेका छन् । 

उनले नेपाल मेडिकल काउन्सिलमा उजुरी दिएको लामो समय भए पनि अहिलेसम्म काउन्सिलले कुनै निष्कर्ष ननिकालेको पराजुली बताउँछन् ।