सिंहदरबार दक्षिण गेटसँगै ९१ करोडमा नेपाल आयल निगमको अत्याधुनिक र सुविधा सम्पन्न १४ तले कर्पोरेट भवन निमार्ण सकिएको छ । पुरानो भवन २०७२ सालको भूकम्पले चर्किएपछि निगमले पुरानो भवन भत्काएर यो सुविधा सम्पन्न भवन निमार्ण गरेको हो । 

निगमका विभिन्न विभाग अहिले यही भवनबाट सेवा दिन थालेका छन् । दुई तला बेसमेन्ट सहित १४ तलाको भवन आधुनिक र सुविधा सम्पन्न ढङ्गले डिजाइन गरिएको छ ।भवनमा २ वटा लिफ्ट रहेका छन् । यसमा फायर फाइटिङ सिस्टम पनि राखिएको छ । हाइराइज बिल्डिङ भएकाले पनि यसमा नेपालको बिल्डिङ कोड अनुसार फायर हाइजिनको सिस्टम अनिवार्य गरिएको छ । 

२०२१ डिसेम्बर ५ निमार्ण सम्झौता भएर २०२४ नोभेम्बर २५ मा सम्म थियो । तर निर्धातिर समयमा नसकिएपछि थपिएको म्याद असार १३ मा सकिएको छ । कम्पनीले अहिले केहि फुटकर काम बाहेक सबै काम सकेको निगमको कर्पोरेट भवन निर्माण आयोजना प्रमुख राम बन्जाराले बताउँछन् । 

यो भवन निर्माण लागत मूल्य अभिवृद्धि कर (भ्याट) बाहेक ८० करोड ९९ लाख रुपैयाँ हो । १३ प्रतिशत भ्याट थप गर्दा ९१ करोड रुपैयाँ बराबरको लागत पुगेको छ। भवन निर्माणको क्षेत्रफल ९५९५.६५ वर्गमिटर रहेको छ । दुई वटा बेसमेन्टमा ६० बढी गाडी र ७० वटा मोटरसाइकल अटाउन सक्ने क्षमता छ ।

नयाँ भवनमा आयल निगमका ७ वटा विभाग छन् । जसमा आपूर्ति तथा वितरण विभाग, वित्त विभाग, प्रशासनिक विभाग, इन्जिनियरिङ परियोजना तथा सूचना प्रविधि विभाग, गुणस्तर नियन्त्रण विभाग, आन्तरिक नियन्त्रण विभाग, डेटा केन्द्र, एलपीजी उड्डयन विभाग, पुस्तकालय डीएमडी मार्केटिङ रहनेछन् । 

यस्तै भवनमा १ सय जनाभन्दा बढी अटाउने सेमिनार हल र स्टोर रहने गरी डिजाइन गरिएको छ । कंक्रिट फ्रेम संरचनामा निर्माण गरिएको भवन बेसिमेन्टबाट ५२.५ मिटर र जमिन तलाबाट ४५.३५ मिटर उचाइ रहेको छ ।