विषय विज्ञ सांसदलाई समितिका सभापति बनाउने रास्वपाकाे तयारी

काठमाडौँ । संसदीय समितिका सभापतिहरूको उम्मेदवार तय गर्न राष्ट्रिय स्वतन्त्र पार्टी (रास्वपा) संसदीय दलको बैठक बस्दै छ ।

दिउँसो सवा १२ बजे सिंहदरबारमा बस्ने बैठकले सभापतिका उम्मेदवार टुंगो लगाउने रास्वपा स्रोतले जनाएको छ । 

Watch On

रास्वपाका शीर्ष नेताहरूले सम्भावित सभापतिहरूको नाममा छलफल गरिसेको बताइएको छ ।

'विषय विज्ञ सांसदहरूलाई नै विषयगत समितिको सभापति बनाउने हो',स्रोतले भन्यो ' सम्भवत सभापति रवि लामिछानेले आजको बैठकमा समितिका  सभापतिहरूको नाममा प्रस्ताव गर्नुहुने छ ।' 

संघीय संसद् अन्तर्गत १६ वटा संसदीय समिति रहेका छन् । प्रतिनिधिसभा अन्तर्गत १० वटा र राष्ट्रिय सभा अन्तर्गत ४ वटा समिति रहेका छन् । दुई वटा संयुक्त समिति रहेका छन् ।

राष्ट्रिय सभा अन्तर्गतका विषयगत समितिका सभापतिहरूको निर्वाचन यसअघि नै भइसकेको छ । प्रतिनिधिसभा अन्तर्गतका १० वटा र संयुक्त दुई वटा समिति सभापतिको निर्वाचन हुन बाँकी छ ।

गत चैत २७ गते प्रतिनिधिसभाले विषयगत समितिमा रहने सदस्यहरू तय गरेको थियो । सोही दिन सभामुख डोलप्रसाद अर्यालले आगामी शुक्रवार संसदीय समितिका सभापतिको निर्वाचनको मिति तोकेका थिए ।

सम्बन्धित समितिका कुनै सदस्यलाई सभापतिमा निर्वाचित गरियोस् भनी सोही समितिका एक जना सदस्य प्रस्तावक रही सोही समितिका कुनै अर्को एक जना सदस्यको समर्थनसहित सभापतिमा दाबी प्रस्तुत गर्न सक्दछन् ।

यस्तै रास्वपाले प्रमुख सचेतक र सचेतकहरू पनि टुङ्गाउने तयारीमा रहेको छ । पार्टी र संसद्लाई चलायमान बनाउन सक्ने व्यक्तिहरू संसदीय भूमिकामा राख्ने गरी तयारी भइरहेको बताइएको छ । 

'केही नामहरूमा छलफल भएको छ, सम्भवतः आज नै पार्टीले प्रमुख सचेतक र सचेतक पनि टुंगो लगाउने छ',स्रोतले भन्यो ।