सहकारी समस्या समाधानमा मन्त्री रावलका तीन प्राथमिकताः कर्जा असुली, बचत फिर्ता र नियमन

काठमाडौँ । भूमि व्यवस्था, सहकारी तथा गरिबी निवारणमन्त्री प्रतिभा रावलले सहकारी पीडितको वचत रकम फिर्ता गर्दा राज्यकोषबाट रकम नजाने स्पष्ट पारेकी छिन् । 

प्रतिनिधि सभाअन्तर्गतको कृषि, सहकारी तथा प्राकृतिक स्रोत समितिको बैठकमा बोल्दै मन्त्री रावलले सहकारीको ऋण असुलीमार्फत बचतकर्ताको रकम फिर्ता गरिने बताएकी हुन् । उनले सहकारी ऋणीहरूलाई ऋण फिर्ता गर्नको लागि सार्वजनिक सूचना समेत जारी गरिसकिएको समिति बैठकमा जानकारी गराइन् । 

Watch On

‘हामीले १५ दिने सूचना समेत जारी गर्यौं । सोहीअहनुसार नाम सार्वजनिक गर्दै जान्छौँ । हामीले नाम सार्वजनिक गरिसकेपछि पनि ठूला ठूला ऋणी हाम्रो सम्पर्कमा आउनुभएको छ । त्यसकारण सहकारी समस्या समाधान हामी राज्य कोषको रकम अथवा करबाट गर्न लागेका होइनौँ यसमा तपाईंहरू क्न्फ्युज नहुनुहोला । ऋण असुली गरेर नै तिर्ने हो । हामी यसमा कमिटेड छौँ । यसरी नै लागिरहेका छौँ ।’ मन्त्री रावलले भनिन् । 

उनले सरकारको पहिलो प्राथमिकता भनेको ऋण असुली, दोस्रो बचतकर्ताको रकम फिर्ता र तेस्रो  नियमन भएको बताइन् । उनले बचतकर्ताको रकम फिर्ताका लागि बजेट पहिले नै विनियोजन भइसकेको र वर्तमान सरकारले निकासा मात्रै गरेको स्पष्ट पारिन् । 

त्यस्तै सहकारीहरूको नियमनलाई कडाइ गर्न अध्यादेशमार्फत केही कानुन थपघट गरिएको उनको भनाइ छ ।