संघले पठाएको प्रमुख प्रशासकीय अधिकृतलाई वीरगंज महानगरले हाजिर हुन नदिने, अर्को नपठाए तालाबन्दी गर्ने निर्णय

वीरगंज । वीरगंज महानगरपालिकाका जनप्रतिनिधिहरूले प्रमुख प्रशासकीय अधिकृतको विषयलाई लिएर भोलिदेखि महानगरपालिकामा तालाबन्दी गर्ने निर्णय गरेका छन् । 

सङ्घीय मामिला तथा सामान्य प्रशासन मन्त्रालयले लामो समयदेखि नयाँ प्रमुख प्रशासकीय अधिकृत नपठाएको तथा हालका प्रमुख प्रशासकीय अधिकृतको आर्थिक र प्रशासनिक अधिकारसमेत खोसेको विरोधमा यस्तो निर्णय गरिएको महानगरपालिकाले जनाएको छ । 

Watch On

सोमवार बसेको बोर्ड बैठकले अत्यावश्यक सेवाबाहेक महानगरका सम्पूर्ण सेवा बन्द गर्ने तथा कार्यालयको साँचो मन्त्रालयलाई बुझाउने निर्णय गरेको महागरले जनाएको छ  । महानगरका अनुसार प्रमुख प्रशासकीय अधिकृतको विषयमा मन्त्रालयलाई पटक–पटक मौखिक तथा लिखित रूपमा जानकारी गराए पनि हालसम्म कुनै ठोस निर्णय नभएको र केवल आश्वासन मात्रै प्राप्त भएको छ । 

मेयर राजेशमान सिंहका अनुसार गत फागुन १२ गते निर्वाचन आचारसंहिता लागू रहेको अवस्थामा सरकारले रेशमलाल कँडेललाई वीरगंज महानगरपालिकाको प्रमुख प्रशासकीय अधिकृतका रूपमा खटाएको बताए । तर कँडेल हालसम्म महानगरपालिकामा औपचारिक रूपमा हाजिर हुन नआएको उनको दाबी छ । तर प्रशासकिय अधिकृत कंडेल भने  महानगरले हाजिर नगराएकाले जिल्ला प्रशासन कार्यालयमा हाजिर गरिरहेका छन् । 

महानगरपालिकाले मन्त्रालयलाई जानकारी गराएपछि मन्त्रालयले पहिलोपटक सात दिनभित्र र दोस्रोपटक तीन दिनभित्र हाजिर हुन निर्देशन दिएको भए पनि कंडेल उपस्थित नभएको नगरप्रमुख सिंहको दाबी छ ।

उनले विधिवत् रूपमा कार्यालयमा हाजिर नभएका कँडेलले सञ्चारमाध्यममार्फत नगरप्रमुखले आफूलाई हाजिर हुन नदिएको प्रचार गरेको दाबी गरेका छन् । महानगरले प्रशासकीय अधिकृत उपस्थित नगराएपछी संघीय मन्त्रालयले तत्कालीन प्रमुख प्रशासकीय अधिकृत अरविन्दलाल कर्णको आर्थिक तथा प्रशासनिक अधिकारमा रोक लगाइसकेको छ ।

महानगरपालिकाको आर्थिक तथा प्रशासनिक अधिकार रोकिएपछि योजना सञ्चालन, भुक्तानी प्रक्रिया तथा सेवा प्रवाह प्रभावित भएको छ । वडाध्यक्षहरूको संयुक्त बैठकले अन्तिम आर्थिक वर्ष भएकाले आफ्नो अनुकुलको  प्रशासकीय अधिकृत हुनुपर्ने भन्दै तालाबन्दीको निर्णय गरेका छन् ।

महानगरका जनप्रतिनिधिहरूले मन्त्रालयले तत्काल वैकल्पिक प्रमुख प्रशासकीय अधिकृत नपठाएसम्म आन्दोलनका कार्यक्रम जारी रहने चेतावनी दिएका छन् । 

नगरप्रमुख सिंहले जोकोही प्रमुख प्रशासकीय अधिकृत स्वीकार्य हुने तर पछिल्ला घटनाक्रमका कारण कंडेल भने स्वीकार्य नहुने स्पष्ट पारेका छन् ।