प्रेस स्वतन्त्रताप्रति सरकार प्रतिबद्ध छ- सञ्चारमन्त्री

काठमाडौँ । सूचना तथा सञ्चारमन्त्री डा. विक्रम तिमिल्सिनाले प्रेस स्वतन्त्रताप्रति सरकार पूर्ण प्रतिबद्ध रहेको बताएका छन् ।

प्रतिनिधिसभामा सञ्चार मन्त्रालयसँग जोडिएका विभिन्न विषयमा जानकारी गराउँदै उनले संविधानले दिएको अधिकार कसैले खोस्न नसक्ने बताएका हुन् । 
उनले भने– ‘प्रेस स्वतन्त्रताप्रति सरकार प्रतिबद्ध छ । यो संविधानले दिएको अधिकार हो, यसलाई कसैले हनन् गर्न सक्दैन ।’

Watch On

मन्त्री तिमिल्सिनाले स्वतन्त्रता भनेको स्वच्छन्दता नभएको स्पष्ट पारे । ‘प्रेस स्वतन्त्रता भनेको स्वच्छन्दता होइन, यसका पनि आफ्नै दायित्व र जिम्मेवारी छन् । प्रेसले आफ्नो गरिमा कायम गर्न सक्नुपर्छ ।’

मन्त्री तिमिल्सिनाले ढुक्क भएर आफ्नो काम गर्न पत्रकारहरुलाई आग्रह गरे । ‘संविधानले दिएको सीमाभित्र रहेर ढुक्क भएर काम गर्न पत्रकारहरुलाई अनुरोध गर्न चाहन्छु’ उनले भने । सरकारले प्रेसलाई नियन्त्रण गर्न खोजेको हो कि भन्ने आशंका नराख्न पनि उनले आग्रह गरे ।

मन्त्री तिमिल्सिनाले प्रेस काउन्सिललाई सशक्त बनाउने र यसको प्रभावकारिता बढाउने विषयमा सरकार प्रतिबद्ध रहेको बताउँदै चलचित्रलाई कलाभित्र नसमेटिएको विषयमा सरकारको ध्यानाकर्षण भएको जानकारी दिए । उनले यो विषय बजेटमा समेटिने पनि जानकारी दिए ।

मन्त्री तिमिल्सिनाले सूचना प्रविधि विधेयक, साइबर विधेयक र एआई विधेयक तर्जुमाको चरणमा रहेको पनि जानकारी दिए । उनले दुर्गम क्षेत्रमा पनि इन्टरनेटको सेवा र पहुँच विस्तारमा सरकार लागि परेको जानकारी दिए ।