काठमाडौँ । सुन्धारास्थित केन्द्रीय कारागार जगन्नाथदेवलको अग्लो पर्खाल, त्यसमाथि काँडेतार अनि सुरक्षाकर्मी सहित सिसिटिभीको २४ सै घण्टा उच्च निगरानी । 
नेपालको केन्द्रीय कारागार सुनधारा कारागारका यी बन्देजले कैदी सपनाको प्रेमलाई रोक्न सकेन । 

नाम: सपना तामाङ
उमेर: २५ वर्ष
तोकिएको कैद सजाय: २५ वर्ष अर्थात् जन्मकैद 
कसुर: हत्या, अपहरण र डाँका चोरी ।

Watch On

सपना, जगन्नाथदेवलको महिला बल्कमा कैदीका रूपमा थुनामा थिइन । जेठ ३ गते बिहान, प्रहरी सहित कारागारको आन्तरिक प्रशासनले कैदी नम्बर गणना गर्दा एक जना कैदी कम भयो, किनकि त्यहाँ कैदी सपना भेटिइनन् ।

त्यसपछि उनको खोजी सुरु भयो । कारागार प्रशासन र सुरक्षाकर्मीले सिसिटिभी हेर्दा बल्ल चाल पाए कि, सपनाले मध्यरातमै जेल ब्रेक गरेकी रहिछन् । 
सिसिटिभीमा देखिएको फुटेज अनुसार बिहान १ बजे नै सपना कारागारको पर्खाल चढेर भागेकी रहिछन् । त्यसपछि प्रहरीले उनको खोजी सुरु गर्‍यो ।

सपना भागेको सूचना पाए लगत्तै प्रहरीले खोजी कार्य सुरु गरेको थियो । प्रहरीले सिसिटिभीमा उनी भागेको यकिन गरेपछि उनी जान सक्ने सम्भावित ठाउँको सूची बनाएर खोजी गर्न थाल्यो । उनी कारागारमा हुँदा समीर श्रेष्ठसँग नजिक भएको खुल्यो । 

समीर, सपनासँग कारागारमा रहेकी सीता थापा श्रेष्ठका छोरा हुन् । सपना र सीता कारागारभित्रकै उद्योगमा सँगै काम गर्थे । सोही क्रममा समीर आमालाई भेट्न जाने आउने गर्दा सपनासँग नजिकिए । उनीहरू पर्खाल वारिपारिबाटै प्रेममा परे । समीर कारागारमा आमालाई खाने कुरा, उद्योगका कच्चा पदार्थ लैजाँदा सपनालाई पनि केही लगिदिन्थे । उनीहरूको कारागारमै नियमित जसो भेट हुन थाल्यो । 

जेन–जी आन्दोलनपछि कारागारबाट सपना भागिन् । त्यसपछि केही समय समिरसँगै बसिन् । करिब २ महिनापछि रसुवाको धुन्चेबाट प्रहरीले उनलाई पक्राउ गरेको थियो । उनी गाउँको एउटा घरको ढोका फोडेर लुकेर बसिरहेको सूचना पाएपछि पुगेको जिल्ला प्रहरी कार्यालय, रसुवाको टोलीले पक्राउ गरेर काठमाडौँ पठाएको थियो । अहिले सपनालाई अनुसन्धान गरिरहेको प्रहरी स्रोतका अनुसार पहिलो पटक भागेर सँगै बसेपछि सपना र समीर झन् नजिक भए, सपनाका अनुसार माया बढ्यो  । दोस्रो पटक कारागार फर्किए लगत्तै उनी भाग्ने योजनामा थिइन् । 

त्यसपछि समीरकै साथ पाएपछि उनी कारागारबाट भागेर समीर सँगै बस्ने तयारीमा थिइन् । सोही अनुसार उनी जेठ ३ गते राती कारागारबाट भाग्ने दुस्साहस गरिन् । 

कारागारबाट भागेपछि सपना समीर सँगै बसेकी थिइन् । प्रहरीका अनुसार कारागारबाट भागेपछि उनीहरू काम खोज्न समेत डुलेका थिए । तर काम पाइएको थिएन ।

अनुसन्धानका क्रममा प्रहरीले सपनालाई भाग्ने योजना बारे सोधेको थियो । उनका अनुसार पहिलो पटक भागेपछि दोस्रो पटक भाग्ने योजनामा लागिन् । २५ वर्ष सजाय काटेर निस्किदा आफू ५० वर्ष पुग्ने कुराले सपना त्रसित थिइन्, त्यसैले उनी जसरी पनि भाग्न चाहन्थीन् । यसका लागि कारागारमै भएकी अर्की विदेशी महिलासँग योजना बनेको थियो । तर अन्तिममा विदेशी महिलाले नमानेपछि उनी एक्लै भागेकी थिइन् । 
प्रहरीले उनलाई भगाउन सहयोग गरेको आरोपमा श्रेष्ठलाई समेत पक्राउ गरेको छ ।
...................
क्रूर अपराधकी कैदी हुन् सपना 

सामान्य कैदीका लागि कारागारबाट भाग्ने आँट गर्नु सामान्य होइन । तर सपना सामान्य कसुरकी कैदी होइनन् । उनी सानो उमेरमै क्रूर अपराध सजाय भोग्दै छिन् । 
उनी ६ वर्षीया बालिकाको अपहरण गरी लुटपाट पछि हत्या गरेको कसुरमा दोषी ठहर भएर सजाय भोगिरहेकी हुन् । 
सपनाको क्रूर अपराधको घटना यस्तो थियो:

२०७७ मङ्सिर २० गते रसुवाको कालिका गाउँपालिका–१, फैलिगाङकी ६ वर्षीय सुमिना तामाङ स्थानीय ग्राङ प्राथमिक विद्यालयबाट घर फर्किँदै थिइन् । सुमिनाले सुनको मुन्द्रा लगाएको देखेपछि सपनाले सुमिनाको मुन्द्रा थुतेर भाग्न खोजिन्, चोरी डकैतीमा पनि सपना माहिर थिइन, किनकि यस अघि पनि तीन पटक चोरी मुद्दामा पक्राउ परिसकेकी थिइन् । 
६ वर्षीय सुमिनाको मुन्द्रा चोरेर भाग्न खोजे पनि बालिकाले चिनेकाले पक्राउ पर्ने डरले उनी सुमिनालाई अपहरण गरिन् । 
त्यसपछि हत्या गरेर रसुवाकै कालिका गाउँपालिका–१, पलेपस्थित नागुर्दुङ भीरको ओडार मा लगेर सेउलाले छोपिदिएकी थिइन् । यो अपराध गर्दै गर्दा सपना १९ वर्षकी थिइन् ।

त्यो घटना अघि पनि तीन पटक पक्राउ परेकी उनलाई एक वर्ष भक्तपुरस्थित बाल सुधार गृहमा राखेको थियो । पछि फेरी बालिकाको हत्या गरेपछि उनलाई रसुवा जिल्ला अदालतले दोषी ठहर गर्दै रसुवा कारागारको थुनामा पठाएको थियो । त्यसपछि कारागार सरुवा भएर केन्द्रीय कारागार जगन्नाथदेवलको महिला ब्लकमा आएकी थिइन् ।

अहिले उनलाई प्रहरीले अनुसन्धान गरिरहेको छ । यति धेरै सुरक्षा बन्दोबस्त गरिएको केन्द्रीय कारागारबाटै सपना सजिलै कसरी भाग्न सफल भइन् भन्ने विषयमा अनुसन्धान केन्द्रीत छ । 

कारागारको आन्तरिक प्रशासन, सुरक्षाकर्मी लगायतको भूमिका माथि अनुसन्धान चलिरहेको प्रहरीले जनाएको छ ।