नक्कली भुटानी शरणार्थी प्रकरणमा आज फैसला सुनाइँदै

काठमाडौँ । बहुचर्चित नक्कली भुटानी शरणार्थी प्रकरणमा आज फैसला आउने सम्भावना बढेको छ ।

जेठ २७ गतदेखि काठमाडौँ जिल्ला अदालतमा सुरु भएको सुनुवाइ आज सकिएर न्यायाधीश तेजबहादुर खड्का फैसला लेख्न बसेको जिल्ला अदालतका सूचना अधिकारी शिव खतिवडाले जानकारी दिए । 
मुद्दाका प्रतिवादीहरू धेरै भएकाले सबैको फैसला आजै आउने सम्भावना कम भए पनि केहीको फैसला आउने जनाइएको छ । 

Watch On

उच्चपदस्थ राजनीतिक तथा प्रशासनिक व्यक्तिसमेत मुछिएको यो मुद्दामा पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाण, पूर्वगृहसचिव टेकनारायण पाण्डे, पूर्वसभासद् आङटावा शेर्पालगायत पूर्वमन्त्री, बहालवाला सचिव, गृहमन्त्रीका सुरक्षा सल्लाहकार, निजी सचिव तथा अन्य उच्चपदस्थ व्यक्तिहरू प्रतिवादी छन् ।

समग्र नेपालीलाई लज्जित तुल्याउने एउटा मुद्दा– नक्कली भुटानी शरणार्थी मुद्दा

अहिलेसम्म रायमाझी जेलमै छन् भने खाण धरौटीमा रिहा भएका छन् ।

जिल्ला सरकारी वकिलको कार्यालयले पहिलो चरणमा २०८० जेठ १० गते ३० जनाविरुद्ध ठगी, लिखत किर्ते, राज्यविरुद्धको कसुर तथा सङ्गठित अपराधसम्बन्धी अभियोग लगाउँदै मुद्दा दायर गरेको थियो ।
त्यसपछि २०८१ वैशाख ९ गते थप ५ जनालाई प्रतिवादी बनाउँदै अर्को मुद्दा दर्ता गरिएको थियो ।

बेचन झा पक्राउ परेपछि २०८१ साउन २९ गते तेस्रो मुद्दा दायर गरिएको थियो। अदालतले यी तीनवटै मुद्दालाई एकीकृत गरी सुनुवाइ गरेको हो।

अदालतको फैसला सुन्न नेता तथा कर्मचारीका आफन्त, शुभेच्छुक अदालत परिसरमा जम्मा भएका छन् ।