बडीमालिकामा द्रुत गतिमा टेलिफोन र इन्टरनेट पुर्‍याउन सञ्चारमन्त्रीले दिए निर्देशन

काठमाडौं । बाजुरा जिल्लाको विकट पर्यटकीय क्षेत्र बडीमालिकामा तत्काल टेलिफोन र इन्टरनेट सेवा विस्तार गर्न सञ्चारमन्त्री डा. विक्रम तिमिल्सिनाले नेपाल टेलिकमलाई निर्देशन दिएका छन् ।

सडक सञ्जालको पहुँच नपुगेको उक्त क्षेत्रमा टावर निर्माणका लागि आवश्यक पर्ने सामग्री नेपाली सेनाको हेलिकप्टरमार्फत तत्काल ढुवानी गर्ने प्रबन्ध मिलाउन मन्त्री तिमिल्सिना ताकेता गरेका छन् । मन्त्रालयमा आयोजित छलफलका क्रममा नेपाल टेलिकम साउन मसान्तभित्रै बडीमालिकामा टेलिफोन सेवा सञ्चालनमा ल्याउने प्रतिबद्धता जनाएको थियो । आवश्यक सामानहरू यसअघि नै धनगढीसम्म पुर्‍याइएको टेलिकमले बताएको छ ।
देशका दुर्गम भूगोलमा समेत गुणस्तरीय सञ्चार सेवा पुर्‍याउने सरकारी नीतिको एक हिस्सा रूपमा यो कदम चालिएको हो । बाजुराको बडीमालिका मन्दिर क्षेत्र (४,२०० मिटर उचाइ) मा तत्काल फोरजी सेवा सञ्चालन गर्ने लक्ष्य राखिएको छ । यसअघि डोल्पाका केही उच्च स्थानहरू तथा ताप्लेजुङको ओलाङचुङगोला क्षेत्रमा पनि सफलतापूर्वक फोरजी सेवा सुरु भइसकेको छ ।

Watch On

बडीमालिका नगरपालिकाका प्रमुख अमरबहादुर खड्कासँग भएको छुट्टै भेटमा मन्त्री तिमिल्सिना स्थानीय पूर्वाधार र सडक सञ्जालको अवस्थाबारे जानकारी लिए। साथै, प्रधानमन्त्रीका सूचना, सञ्चार तथा प्रविधि सल्लाहकार विवेक मिश्रसँगको छलफलका क्रममा अनलाइन सट्टेबाजी (बेटिङ) एपहरू बन्द गर्ने र अनलाइन ठगी नियन्त्रणलाई प्रभावकारी बनाउने विषयमा समेत महत्त्वपूर्ण परामर्श भएको छ ।

सञ्चार सेवाको गुणस्तर अभिवृद्धि गर्न सरकार देशैभर करिब १६ सय नयाँ टेलिफोन टावर निर्माणको प्रक्रिया अगाडि बढाइसकेको छ । ग्रामीण क्षेत्रमा सेवा विस्तारका लागि मात्रै नेपाल टेलिकम आगामी आर्थिक वर्षमा छ अर्ब रुपैयाँभन्दा बढी लगानी गर्ने योजना बनायो ।