त्रिविले नतिजा नआउँदै जलायो १८३ विद्यार्थीको उत्तरपुस्तिका, पुन: परीक्षाको तयारी

काठमाडौँ । त्रिभुवन विश्वविद्यालय परीक्षा नियन्त्रण कार्यालय (पनिका)ले नतिजा नआउँदै १८३ विद्यार्थीको उत्तरी पुस्तिका जलाएको पाइएको छ । 

Watch On

गत वैशाखमा सञ्चालित स्नातक तह पहिलो वर्षको जनसंख्या विषयका १८३ थान उत्तरपुस्तिका भेटिएका छैनन् । परिक्षा सकिएर परिक्षण भैसकेपछि सम्परीक्षणका लागि पनिकामा ल्याइएपनि लेजरमा प्राप्त अङ्क चढाउने बेलामा उत्तरपुस्तिका नभेटिएको त्रिवि पनिकाका एक अधिकारीले बताए । 

उनका अनुसार सम्भावित सबै ठाउँमा खोजी गरेपनि नभेटिएपछि पुराना उत्तर पुस्तिकासँगै जलाइएको हुन सक्ने निष्कर्षमा पनिका पुगेको छ । उनले भने 'खोज्नु पर्ने सबै ठाउँमा खोजियो कतै भेटिएन, पुराना उत्तरपुस्तिका चलाउने बेलामा यि उत्तरपुस्तिका भएको पोको पनि परेको हुन सक्ने देखियो ।'

उत्तरपुस्तिका नभेटिएपछि पनिकाले पुन: परीक्षा लिने विषयमा छलफल सुरु गरेको छ । ति अधिकारीका अनुसार एक वर्षसम्म नतिजा कुरेर बसेका विद्यार्थीलाई फेरी परीक्षा दिन लगाउने विकल्पमा छलफल भइरहेको हो । उनले कुन क्याम्पसका विद्यार्थीको उत्तरपुस्तिका हराएको हो भन्ने खुलाउन चाहेनन् । 

हराएको उत्तरपुस्तिका खोज्न छानबिन समिति नतिजा सार्वजनिक गर्ने बेलामा उत्तरपुस्तिका गायब भएपनि खोजी गर्न पनिकाले छानबिन समिति बनाएको थियो । राजनीतिक शास्त्र केन्द्रीय विभागका विभागीय प्रमुख ईश्वरीप्रसाद कँडेलको संयोजकत्वमा गठित दुई सदस्यीय छानबिन समितिले छानबिन सकिएपनि प्रतिवेदन बुझाउन बाँकी रहेको जनाइएको छ । 

अहिलेसम्म हराएको, जलाइएको भन्ने कुरा सार्वजनिक भएपनि प्रतिवेदनले दिने निष्कर्षका आधारमा थप प्रक्रिया अघि बढ्ने पनिकाले जनाएको छ । दोहोरी रहने रोग त्रिविमा उत्तरपुस्तिका हराउन नयाँ समस्या भने होइन । गत वर्ष पनि बीबीएस चौथो वर्षको उत्तरपुस्तिका हराएपछि साढे २ सय विद्यार्थीले पुन परीक्षा दिएका थिए । झापाको दमक बहुमुखी क्याम्पसका विद्यार्थीको उत्तरपुस्तिका हराएको थियो । उनीहरूको पुन परीक्षा मात्रै नतिजा सार्वजनिक भएको थियो । 

उत्तरपुस्तिका माथि त्रिवीको लापरवाही लगातार दुई वर्ष उत्तरपुस्तिका हराउँदा पनि त्रिवीको पनिका पुन परीक्षा गराएर दोषीलाई उन्मुक्ति दिने तयारमा लागेको त्रिवीकै प्राध्यापकहरू बताउँछन् । 'पनिकाको लापरवाहीले त्रिवी बदनाम भयो, उत्तरपुस्तिका गायब पार्ने व्यक्ति पहिचान हुँदा पनि कारबाही भएन', एक सहप्रध्यापकले गुनासो गरे । 

'नतिजा कुरेर बसेका विद्यार्थीलाई वर्षदिन पछि परीक्षा दिन बोलाउने ? एक व्यक्ति र संस्थाको लापरवाहीको सजाय विद्यार्थीलाई दिन मिल्छ' उनले प्रश्न गरे । गत वर्ष एक प्राध्यापकका कारण उत्तरपुस्तिका हराएको देखिएपनि उनलाई कुनै कारबाही भएको थिएन । यो वर्षपनि उत्तरपुस्तिका गायब भएपछि त्रिवीको संयन्त्रमाथिनै प्रश्न उठेको छ ।