मकवानपुर । मकवानपुरमा सिमेन्ट उद्योगका लागि विभिन्न स्थानका खानीबाट निकालिएका चुनढुङ्गा बोकेका टिपरहरु प्रहरी प्रशासनभन्दा पावरफूल देखिएका छन् । भारवहन क्षमता भन्दा बढी भार लिएर आएका यस्ता सवारीहरुले दुर्घटनाको जोखिम मात्र होईन सडक, पुलपुलेसा समेतलाई असर पुर्याएपनि कसैले नियमन गर्न सकेका छैनन् । 

कार्वाही नियमनभन्दा बाहिर रहेका र पहुँचका आधारमा कार्वाही गर्न नसकिएका ओभरलोड बोकेका यस्ता टिपरहरुको विषयमा व्यापक जनगुनासो आएपछि हामी जिल्ला ट्राफिक प्रहरी कार्यालय अगाडी हिजो दिनभरजसो क्यामेरा लिएर पुगेका थियो । सुरुमा यस्ता टिपरको बारेमा प्रश्न गर्दा सामान्य भन्दै पञ्छेको मकवानपुर ट्राफिकले क्यामेरा अन गरेपछि केही टिपर रोक्ने प्रयास गरेको थियो । 

अचम्म के भने, हामी जानु अघि यही बाटो सिमेन्ट उद्योगका लागि सयौं ओभर लोडेड टिपर निर्वाध गुडेको थियो । जिल्ला ट्राफिक प्रहरी आईपुग्नु अघि मकवावानपुरको मनहरी, नेवारपानी, लेवट गरी ३ स्थानमा ट्राफिक प्रहरी पोष्ट रहेका छन् । ती ट्राफिक प्रहरी पोष्टहरुबाट सहजै उन्मुक्ति पाउनुमा ट्राफिक प्रहरीको मिलेमतो भएको प्रशस्त शंका गर्ने ठाउँ रहेको छ । त्यतिमात्र होईन डिआइजीको नेतृत्वमा प्रदेश प्रहरी कार्यालय कै गेट अगाडीबाट यी टिपरहरु जिल्ला ट्राफिक प्रहरी कार्यालय हुँदै जिल्ला प्रहरी कार्यालयको गेट सामुन्नेबाट दैनिक सयौं टिरहरु गुडेका हुन्छन् । तर सरकारको नियामक निकाय निकम्मा जस्तै देखिएको छ । 
ओभर लोडेड टिपरका चालकहरु अरुले नै लोड गरेकाले आफ्नो दोष नरहेको दाबी गर्दै आएका छन् । 

हामीले क्यामेराले ओभर लोडेड टिपरहरको दृश्य खिच्न लागेपछि जिल्ला ट्राफिक प्रहरी कार्यालयका प्रमुख प्रहरी निरीक्षक केशव अधिकारी आईपुगेका थिए । हामीले उनलाई तपाईको ट्राफिक पोष्ट पार गरेर कसरी आईपुगे भन्ने प्रश्नमा जनशसक्ति अभावले कार्वाही गर्न नसकिएको हल्का जवाफ दिएर उम्किने प्रयास गरेका थिए । 

यो अवैध धन्दा दुरदराजमा भएको होईन, प्रहरी प्रशासनको आँखै सामुन्ने भएका हुन् । यसलाई नियमन गर्न भन्दै पटक पटक प्रहरीले छलफल गराउने गरेको पनि छ । तर प्रहरीको छलफलले मुर्त रुप पाउन सकेको छैन र प्रहरी प्रशासन भन्दा सिमेन्ट उद्योगका चुनढुङ्गा बोकेका ओभर लोडेड टिपरहरु पावरफूल देखिएका छन् । 

मापदण्ड विपरित ओभर लोडेड पिरहरुको नियमन गर्न बसेका निकाय अहिले पनि मौन बस्नुले अवैध कार्य हुनुमा प्रहरी प्रशासनको पनि अप्रत्यक्ष सहयोग रहेको पुष्टि भएको छ । 

मालबाहक सवारीको भारवहन निर्देशिका २०७४ को दफा ९ अनुसार क्षमता भन्दा बढी भार बोकेमा बढी भएको सामान तत्काल ओराली भार मिलान गरी जरीवाना गर्नुपर्ने नियम छ । तर मकवानपुर प्रहरी प्रशासन यो विषयमा मौन बसेको छ । सञ्चारकर्मीहरु देखेमा, वा कसैले आवाज उठाएमा सामान्य जरीवाना गरेर टिपरमैत्री व्यवहार गर्दै भार मिलान नै नगरी छोड्ने गर्नुले प्रहरी प्रशासन तर्फ गम्भीर प्रश्न सोझिएको छ । 

चुनढुङ्गा खानीबाट सिमेन्ट फ्याक्ट्रीसम्म ढुवानी गर्दा ट्राफिक नियमको पालना गरी सुरक्षित तरिकाले ढुवानी कहिले बाट हुन्छ ? हामी यो विषयमा पुन फलो अप गर्ने छौं ।