समाज

वीरगंजमा प्रहरी, पत्रकार लगायतको ‘ग्याङ’बाट कुटिएका वडाध्यक्षविरुद्ध पनि पक्राउ पुर्जी जारी

सिधाकुरा

मंगलबार, चैत १२, २०८१

वीरगंजमा प्रहरी, पत्रकार लगायतको ‘ग्याङ’बाट कुटिएका वडाध्यक्षविरुद्ध पनि पक्राउ पुर्जी जारी

पर्सा । वीरगंजमा प्रहरी, पत्रकार, वडाध्यक्ष लगायतको ‘ग्याङ’बाट कुटिएका वडाध्यक्षविरुद्ध पनि पक्राउ पुर्जी जारी भएको छ । जिल्ला अदालत पर्साले वीरगञ्ज महानरपालिका–२५ का वडाध्यक्ष आशुतोष चतुर्वेदीमाथि पक्राउ पुर्जी दिएको हो ।

Watch On

वडाध्यक्ष चतुर्वेदीलाई कुट्नेहरुले उनीविरुद्ध सरकारी वकिलको कार्यालय पर्सामा निवेदन दिएका थिए । सोही निवेदनका आधारमा उनीविरुद्ध पक्राउ पुर्जी जारी भएको हो । मंगलबार जिल्ला अदालत पर्साले उनीविरुद्ध पक्राउ पुर्जी जारी गरेको पर्सा प्रहरी प्रमुख एसपी गौतम मिश्रले सिधाकुरालाई बताए ।
‘सरकारी वलिकको निवेदनका आधारमा उनीविरुद्ध पनि पक्राउ पुर्जी जारी भएको छ । अब दुवै पक्षलाई पक्राउ गरेर सँगै अनुसन्धान अघि बढाउछौँ ।’, एसपी मिश्रले भने ।

वडाध्यक्ष चतुर्वेदीमाथि कुटपिट प्रकरणमा गत १० गते प्रहरीले ७ जना विरुद्ध अदालतबाट पक्राउ पुर्जी लिएको थियो । वडाध्यक्षको ज्यान मार्ने उद्योगको जाहेरीपश्चात उनीहरुविरुद्ध पक्राउ पुर्जी जारी भएको थियो । सो पुर्जी जारी भएपश्चात आरोपित पक्षले सरकारी वकिलमार्फत कुटिएका वडाध्यक्षविरुद्ध नै जाहेरी दर्ता गराएका हुन् ।

वडाध्यक्ष कुटिएको विषयमा आइतबार नेपाल प्रहरीका वरिष्ठ सई सागर शमशेर जबरा, विपद व्यवस्थापन केन्द्रमा कार्यरत प्रहरी जवान दिपेश क्षेत्री, वीरगंज महानगरपालिका वडा नम्बर १० का वडाध्यक्ष सुशील साह कानु, नेपाल पत्रकार महासंधका उपाध्यक्ष एवं कान्तिपुर मिडिया ग्रुपका पत्रकार भुषण यादव, माइस्थान पुल हाउसका सञ्चालक विक्की गुप्ता, नगवाका भुसाल चौरसिया र घडिअर्वाका लखन गुप्ताविरुद्ध पक्राउ पुर्जी जारी भएको थियो । उनीहरुमध्ये नगवाका भुसाल चौरसिया पक्राउ परेका छन् भने अन्य फरार छन् ।

उनीहरु ७ जनाले फागुन २९ गते राति होलीका दिन मदिराको तालमा वडाध्यक्ष चतुर्वेदीमाथि आक्रमण गरेका थिए । वीरगञ्ज महानगरपालिका–८ स्थित डाइमण्ड पार्टी प्यालेसमा वडाध्यक्ष चतुर्वेदीमाथि आक्रमण भएको सिसिटिभी भिडियो सिधाकुराले सार्वजनिक गरेको थियो ।

सिसिटिभीमा वडा अध्यक्ष चतुर्वेदीमाथि मरुणासन्न हुनेगरि कुटपिट गरेको देखिन्छ ।

सम्बन्धित समाचार :