काठमाडाैँ  । माघ ३ गते काठमाडौँ शोभा भगवतीकी सरिता गिरी प्रहरीको उजुरी एउटा उजुरी लिएर पुगिन् । ‘आफ्नो घरमा डेरा बस्दै आएका व्यक्तिहरू लामो समयदेखि सम्पर्कविहीन छन् ।’ काठमाडौँमा भाडा तिर्न नसकेपछि सामान भित्रै छोडेर कोठामा नफर्कने गरेको उजुरी प्रहरीका लागि नौलो थिएन । यो उजुरी पनि त्यस्तै मध्येको एक थियो । 

नियमित प्रक्रिया जस्तै स्थानीयलाई साथ लिएर प्रहरी परिसर काठमाडौँ र प्रहरी वृत्त स्वयम्भुको टोली सरिता गिरीको घर पुग्यो । प्रहरीले कोठामा लगाएको ताला फुटायो । भित्र हेर्दा त्यो कोठाको नियमित आउने उजुरीको भन्दा फरक र भयानक थियो । कोठा बाहिरबाट ताल्चा मारिएको थियो । प्लास्टर नगरिएको भित्तासँगै जोडेर गलैँचा ओछ्याइएको थियो, सिरक डसना सहितको एउटा खुट्टे खाट थियो र त्यही खाटको मुनी आधा कुहिएको अवस्थामा एक अधबैँसे महिलाको शव थियो । 

कोठाभित्र महिलाको कुहिएको शव देखेपछि प्रहरीले त्यहाँ बस्ने गरेको व्यक्तिहरूको विवरण खोजी गर्यो । प्रहरीले घरबेटीसँग उनीहरूको विवरण मागे तर उनीहरूलाई बहालमा बस्नेहरू को हुन, कहाँका हुन् र के गर्छन केही थाहा थिएन । काठमाडौँ प्रहरी परिसरका प्रमुख भुपेन्द्र बहादुर खत्रीका अनुसार कोठा बहालमा दिने घरबेटीलाई नै बहालमा बस्नेबारे जानकारी नभएपछि प्रहरीलाई मृत भेटिएकी महिला को हुन् भन्ने पत्ता लगाउनै मुस्किल पर्याे । 

त्यसपछि प्रहरी शव सनाखत गराउनतर्फ लाग्यो । सम्भावित व्यक्तिहरूलाई बोलाएर सनाखत गराउँदा ति महिला तनहुँको भिमाद नगरपालिका साविकको किहुँ गा.वि.स. स्थायी घर भएकी ५१ वर्षकी सफिना मियाँ भएको खुल्न आयो । सोही क्रममा उनी विगत १ वर्षदेखि एक पुरुषसँग उक्त कोठामा बस्दै आएको पनि खुल्यो । 

कोठामा बाहिरबाट ताल्चा लगाइएको हुनु, भित्रको कोठामा आग्लो लगाएर कोठा थुनेको हुनुले घटना शंकास्पद त थियो नै, फरेन्सिक टिमले पनि महिलाको हत्या भएको हुनसक्नेतर्फ इंगित गरे । भाडामा बस्ने भागेपछि कोठा खोल्न पुगेको प्रहरीले अब हत्याको अनुसन्धान गर्नुपर्ने भयो । 

प्रहरीले कोठा खानतलासीको क्रममा इकरामउल हक अन्सारी नाम गरेका व्यक्तिको केही कागजात भेटेको थियो । गार्मेन्ट उद्योगमा काम गरेको खुल्ने उक्त कागजले प्रहरीलाई केही सहज बनायो । उक्त कागजमा इकरामको परिचय समेत थियो । उनको ठेगाना भारतको बिहार उल्लेख थियो । इकराम सफिनाको हत्या गरी भारततर्फ फरार भएको हुनसक्ने अनुमानमा प्रहरीले भारतर्फ उनको खोजी गर्यो । तर इकराम २ महिना भारत बसेर नेपालतर्फ नै फर्केको सूचना आयो । प्रहरीले काठमाडौँ, ललितपुर, भक्तपुर र सीमावर्ती जिल्लाहरूका गार्मेन्ट उद्योग, कवाडी पसलहरूमा निगरानी बढायो । 

उनी नेपाल आएर बि।एन। फेसन गार्मेन्टमा काम गर्न थालेको प्रहरीले पत्ता लगायो । आफूलाई प्रहरीले खोजिरहेको सूचना पाएपछि भारततर्फ भाग्दै गरेको अवस्थामा प्रहरीले इकरामलााई कालिमाटीबाट पक्राउ गर्न सफल भयो । इकराम पक्राउ परेपछि सफिनाको मृत्युको राज खुल्यो ।

पहिले लिभिङ टुगेदर, झगडापछि हत्या गरी भारत फरार

इकराम करिब ८/९ वर्षदेखि भारतबाट नेपाल आई गार्मेन्टमा काम गर्दै आएका थिए । उनको श्रीमती र २ सन्तान छन् । यता सफिनाको पनि घरपरिवारसँग खासै राम्रो सम्बन्ध थिएन । सफिना र इकरामको भेट भयो । उनीहरु शोभाभगवतीमा कोठा लिएर सँगै बस्न थाले । उनीहरु सो घरमा १ वर्षअघिदेखि बस्न थालेका थिए । सफिना इकरामकै कमाईमा आश्रित थिइन् । विस्तारै उनीहरुबिच विवाद बढ्दै गयो । प्रहरीका अनुसार इकरामले मदिरा सेवन गरी सफिनाको मोबाइल समेत फुटाइदिएका थिए । 

सोही क्रममा कात्तिकको पहिलो साता सफिनाको हत्या भएको हुनसक्ने प्रहरीको अनुमान छ । यद्यपी फरेन्सिक रिपोर्ट भने आउनै बाँकी छ । इकरामको बयान अनुसार ‘कात्तिक पहिलो साता अन्दाजी करिब ९ बजेको समयमा इकराम मदिरा सेवन गरी कोठामा पुगेका थिए । सो दिन उनीहरुबिच झगडा परेको थियो । विवाद चर्कँदै गएपछि इकरामले ढोकाको आग्लोले शरीरको विभिन्न ठाउँमा प्रहार गरी घाइते बनाए । त्यसपछि इकरामले सफिनाकै सलले घाँटीमा बेरेर सफिनाको हत्या गरे । सफिनाको मुख छोपी शवलाई खाटमुनि धकेलिदिए र इकराम त्यहाँबाट निस्किए । उनले ढोकामा बाहिरबाट ताल्चा लगाइदिए र चाबी बाहिरको झ्याङमा फालिदिए ।’

त्यहाँबाट उनी बिहान ६÷७ बजेतिर वीरगन्ज जाने सुमो चढे र रक्सौल, गुजरात, लखनउ लगायत भारतको विभिन्न ठाउँ पुगे । २ महिना भारतमा लुकिछिपी बसेपछि उनी पुन नेपाल आए । यो बिचमा उनले आफ्ना साथीहरुसँग प्रहरीले आफ्नो खोजी गरे नगरेकोबारे बुझिरहेका हुन्थे । तर करिब ३ महिनासम्म पनि आफ्नाबारे खोजी नभएको जानकारी उनी नेपाल आएको अनुसन्धानमा देखिएको छ । अहिले प्रहरीले सफिना मियाँको हत्यामा अदालतबाट म्याद थप गरेर थप अनुसन्धान गरिरहेको छ ।