मुख्य समाचार

गरिमाका आमाबुबाको गृह मन्त्रालयमै भिडियो खिचिएको भन्दै रास्वपा महामन्त्री आचार्यको प्रश्न

सिधाकुरा

सोमबार, भदौ ८, २०८३

गरिमाका आमाबुबाको गृह मन्त्रालयमै भिडियो खिचिएको भन्दै रास्वपा महामन्त्री आचार्यको प्रश्न

काठमाडौँ । राष्ट्रिय स्वतन्त्र पार्टी (रास्वपा) का महामन्त्री विपिनकुमार आचार्यले तीन वर्षीया गरिमा चौधरीका आमाबुबाको भिडियो गृह मन्त्रालयमै खिचिएको भन्दै आपत्ति जनाएका छन्।

प्रतिनिधिसभाको सोमबारको बैठकमा बोल्दै आचार्यले पीडित परिवार सरकारसँग न्यायका लागि छलफल गर्न पुगेका बेला उनीहरूको भिडियो खिच्ने र सार्वजनिक गर्ने कार्य उचित नभएको बताए।

Watch On

उनले यस्तो कार्य तत्काल बन्द गर्नुपर्ने माग गरे।

बाराको जितपुरसिमरा उपमहानगरपालिका–१ की तीन वर्षीया गरिमा चौधरीको हत्या प्रकरणमा उनका आमाबुबा सरकारसँग छलफलका लागि काठमाडौं आएका थिए। उनीहरू भदौ ६ गते गृह मन्त्रालय पुगेका थिए, जहाँ गृहमन्त्री सुधन गुरुङसहित सरकारका प्रतिनिधिसँग छलफल भएको थियो।

आचार्यले पीडित परिवार न्यायको अपेक्षासहित राज्यको जिम्मेवार निकायमा पुगेका बेला उनीहरूको संवेदनशील अवस्थालाई थप प्रचारको विषय बनाउन नहुने बताएका हुन्।

गरिमा प्रकरणमा सरकार र पीडित परिवारबीच यसअघि तीनबुँदे सहमति भइसकेको छ। सरकारले जघन्य अपराधमा विद्यमान कसुर तथा सजायसम्बन्धी व्यवस्था पुनरावलोकन गरी सुझावसहितको प्रतिवेदन तयार गर्ने र पीडित परिवारको मागअनुसार गरिमाको सालिक निर्माणका लागि पहल गर्ने सहमति जनाएको छ।

प्रकाशित मिति: सोमबार, भदौ ८, २०८३

प्रतिक्रिया दिनुहोस्