चितवन अस्पतालको कारुणिक दृष्यः फोटो बोकेर आफन्तको पर्खाइ (फोटोकथा)

चितवन । भरतपुरका ठाकुरप्रसाद कँडेल र लीलावती सापकोटा बिहीबार बिहानैदेखि भरतपुर अस्पतालको पोष्टमार्टम घर बाहिर छन् । उनीहरुले हातमा दुई युवकको फोटो बोकेका छन् ।

Watch On

ती दुई युवक हुन् – माधव न्यौपाने र सबिन न्यौपाने । यी दुई जना नातामा लीलावतीका भाइ पर्छन् । भोटेकोशीमा बुधबार बिहान आएको बाढीमा परेर उनीहरु बेपत्ता छन् ।

ठाकुरकाअनुसार माधव चीन र नेपालतर्फ सामान आयात–निर्यातमा संलग्न छन् । सबिन बैंकका कर्मचारी हुन् ।  उनीहरु रसुवाबाट बगेर आएको शव चितवनमा भेटिने आशमा अस्पतालको पोष्टमार्टम घर आइपुगेका हुन् ।

संकलन गरेर ल्याइएका शव पनि उनीहरुले हेरे । त्यहाँ दुवै भेटिएनन् । उनीहरुले संकलित शवको विक्षिप्त अवस्था पनि सुनाए । ‘केही शवको टाउको नै छैन । केही शव चिनियाँ नागरिकजस्तो देखियो’ कहालीलाग्दो अवस्था सुनाउँदै ठाकुरले थपे, ‘हामीले खोजिरहेकाहरु यहाँ भेटिएनन्।’

अस्पतालको शव गृहबाहिर अन्य बेपत्ताका परिवार र आफन्त पनि जम्मा भएका छन् । उनीहरुले फोटो प्रिन्ट गरेर र मोबाइलमा आफूले खोजी गरिरहेकाहरुको तस्बिर लिएर आएका छन् ।
अहिलेसम्म चितवनमा ६९ वटा शव फेला परेको छ । अवस्था त यस्तो छ कि, चितवनमा अब शव राख्ने ठाउँको समेत अभाव छ । त्रिशूली र नारायणी नदी किनारमा शवहरुको खोजी कार्य जारी छ ।

तस्बिरः निशा श्रेष्ठ/नेपाल फोटो लाइब्रेरी