रसुवा बाढी: सडक खुलाउन विभिन्न स्थानमा उपकरण परिचालन

काठमाडौँ । रसुवा बाढीका कारण कारण अवरुद्ध सडक सञ्चालनमा ल्याउन विभिन्न सडकखण्डमा उपकरण परिचालन गरिएको छ । 

Watch On

राष्ट्रिय विपद् जोखिम न्यूनीकरण तथा व्यवस्थापन प्राधिकरणकाअनुसार देवीघाटको सडक अवरोध हटाउने काम सम्पन्न भइसकेको छ । गल्छी–विदुर–त्रिशूली तथा बैरेनी–मुग्लिन सडकखण्डमा अवरोध हटाउन उपकरण परिचालन गरिएको छ ।

धुञ्चे–ग्राङ सडकखण्डमा एउटा हिल एक्साभेटर, एउटा लोडर र एउटा टिपर परिचालन गरिएको छ । त्यस्तै, विदुर–त्रिशूली–ढुङ्गे खण्डमा तीनवटा भारी उपकरण परिचालन गरिएको छ । बैरेनी–मुग्लिन खण्डमा एउटा ब्याकहो परिचालन गरिएको छ भने थप एउटा ह्विल लोडर नुवाकोट सडक डिभिजनबाट छिट्टै थप गर्ने तयारी गरिएको छ ।

सडक अवरोध हटाउने कार्यलाई थप प्रभावकारी बनाउन सडक विभागअन्तर्गत काठमाडौँका दुई भारी उपकरण तयारी अवस्थामा राखिएका छन् । सडक डिभिजन मुलकोट र सडक डिभिजन डुम्रे (खैरेनी) मा पनि एक–एक वटा उपकरण राखिएका छन् । त्यस्तै जनकपुरमा नौवटा भारी उपकरण र चार वटा टिपर तयारी अवस्थामा राखिएको प्राधिकरणले जनाएको छ ।

तीन जिल्लामा तत्काल राहत 

नेपाल सरकारले तत्काल राहत कार्य वितरणका लागि रसुवामा रु एक करोड, नुवाकोटमा रु एक करोड र धादिङमा रु ५० लाख गरी कुल दुई करोड ५० लाख नगद पठाएको जनाइएको छ । 

त्यस्तै, काठमाडौँलगायत क्षेत्रबाट राहत सामग्री प्रभावित क्षेत्रतर्फ पठाइएको छ । प्रभावित परिवारलाई खाद्यान्न, पानी, त्रिपाल, कम्बल, सुत्ने सामग्री, सोलार बत्ती, जेनेरेटर, पावर बैंक, सरसफाइ तथा स्वास्थ्यसम्बन्धी सामग्रीलगायत वितरण भइरहेको छ ।

प्राधिकरणको विवरणअनुसार राहतका लागि ५०० झुल, चार हजार २०० वटा २० लिटरका बाल्टिन, एक हजार वटा बालबालिकाका डिग्निटी किट, १०० वटा सेतो टार्पोलिन, १५० वटा स्लीपिङ ब्याग, १०० म्याट्रेस, ७०० वटा कम्बल, ५०० वटा प्लास्टिक सिट, १०० रोल डोरी, एक हजार वटा सोलार ल्याम्प, ५०० वटा सोलार ल्याम्प प्लेट, ३० केभिए क्षमताको एक वटा जेनेरेटर, पावर बैंक, २०० हाराहारी टेन्ट, दुई वटा पोर्टेबल जेनेरेटर, दुई हजार १२० वटा पिरियड प्यान्टी र ९० वटा शव राख्ने ब्याग पठाइएको विवरणमा उल्लेख छ ।