हाइड्रो टनेलमा फसेकाहरुको उद्धारका लागि सबै उपाय अवलम्बन गरिएको छ : ऊर्जामन्त्री श्रेष्ठ

काठमाडौँ । ऊर्जा, जलस्रोत तथा सिँचाइ मन्त्री विराज भक्त श्रेष्ठले प्रतिकूल मौसम र अत्यन्त चुनौतीपूर्ण परिस्थितिका बाबजुद रसुवास्थित त्रिशूली–३ ‘बी’ जलविद्युत् आयोजनाको साइटको रेकी, रेखांकन तथा उद्धार कार्यलाई अघि बढाउन निरन्तर प्रयास भइरहेको बताएका छन् ।

Watch On

मन्त्री श्रेष्ठका अनुसार साइटको अवस्थाबारे जानकारी संकलन तथा उद्धारका लागि सुरुदेखि नै निरन्तर खटिँदै आएका बिनुकुमार बरालसहितको टोली केहीबेर अघि थप हेलिकप्टरमार्फत घटनास्थलतर्फ प्रस्थान गरेको छ । 

प्रतिकूल मौसमका कारण चुनौतीपूर्ण बनेको उद्धार प्रयासलाई सम्भव भएसम्म सुरक्षित र प्रभावकारी ढंगले अघि बढाउन सुरक्षा निकायबीच निरन्तर समन्वय भइरहेको उनको भनाइ छ ।

मन्त्री श्रेष्ठकाअनुसार उद्धारका निम्ति नेपाल विद्युत् प्राधिकरणका कार्यकारी निर्देशक दीर्घायु कुमार श्रेष्ठ तथा त्रिशूली–३ ‘बी’ जलविद्युत् आयोजनाका कार्यकारी निर्देशक आनन्द ढुंगेलले आवश्यक समन्वय र सहकार्य गरिरहेका छन् । 

महाविपत्तिको यस कठिन घडीमा उद्धार तथा पुनःस्थापनाका लागि निरन्तर खटिएका प्राविधिक, कर्मचारी, सुरक्षाकर्मी तथा सम्बन्धित सबैको प्रयासप्रति मन्त्री श्रेष्ठले सम्मान व्यक्त गरेका छन् ।

साथै, सम्पर्कविहीन आफन्त तथा प्रियजनको प्रतीक्षामा रहेका परिवारजनप्रति सहानुभूति व्यक्त गर्दै उनले धैर्य धारण गर्ने शक्ति मिलोस् र सम्पर्कविहीन सबैको सकुशल उद्धार हुन सकोस् भन्ने कामनासमेत गरेका छन् । 

रसुवा बाढीबाट १२ वटा जलविद्युत आयोजनामा क्षति पुगेको छ भने विभिन्न आयोजनाको सुरुङमा पाँच सय बढी मजदुर, कर्मचारी र स्थानीय फसेका छन् ।