भोजपुर । आइतबार बिहान करिब १ः१५ बजे ।

जिल्ला प्रहरी कार्यालय भोजपुरको कन्ट्रोल रुममा एउटा फोन आउँछ । 

फोन उठाउनासाथ एकजना पुरुषले अत्तालिँदै भन्छन्, ‘मैले ४ जनालाई मारेँ । मलाई समाउन आउनुस् ।’

यति भन्नासाथ उनले फोन कटाए । प्रहरीले उनलाई पुनः सम्पर्क गर्ने प्रयास गर्यो । उनले फोन उठाएनन् । 

आधा दर्जन पटक फोन हानेपछि उनले बल्लतल्ल फोन उठाए । हस्याङफस्याङ गर्दै बोलेका उनीसँग प्रहरीले ठेगाना माग्यो । उनले जवाफ फर्काए, ‘मैले धोद्लेखानीका बेलबहादुर गिरीका चारै जनालाई मारेँ ।’

यति भनेर फोन राख्नासाथ जिल्ला प्रहरी कार्यालय भोजपुर र इलाका प्रहरी कार्यालय घोडेटारको टोली रातारात घटनास्थलतर्फ अधि बढ्यो । 

बर्खाको समय, बाढी र पहिरोले दर्जनौँ ठाउँ अवरुद्ध थियो । विभिन्न कठिनाइ छिचोल्दै इलाका प्रहरी कार्यालय घोडेटारको टोली करिब ३ घण्टापछि अर्थात् पौने ४ बजेतिर घटनास्थल पुगे । 

प्रहरी पुग्दा बाँसका भाटाले बारेको, खरले छाएको एक टहरामुनि ४ जनाको बीभत्स हत्या गरेको भेटियो । उनीहरूको शरीरका विभिन्न भागमा चोट लागेको थियो, त्यहीँबाट बगेको रगतले घटनास्थल रक्ताम्मे बनेको थियो ।
प्रहरीले उनीहरूलाई बोलाउने, उठाउने प्रयास गरे । तर त्यो समयसम्म उनीहरूले सास फेर्न छोडिसकेका थिए । 

कन्ट्रोल रुममा फोन गरेर जानकारी गराएको घटनास्थलमा त प्रहरी पुग्यो तर प्रहरीले ती फोन गर्ने व्यक्तिलाई वरिपरि कहीँ देखेन । 
इलाकाले उक्त विषय जिल्लामा जानकारी गरायो । सोही अनुरूप जिल्लाको टोली पनि घटनास्थल पुग्यो । 
सो समयसम्म गाउँमा हल्लाखल्ला सुरु भइसकेको थियो । स्थानीय र प्रहरीले संयुक्त रूपमा प्रहरीलाई फोन गर्ने व्यक्ति खोजी गर्न थाले । 

उनी घटनास्थलभन्दा करिब पाँच किलोमिटर टाढाको दुरीमा रहेको हर्बुभञ्ज्याङमा सख्त घाइते अवस्थामा फेला परे । प्रहरीले फेला पार्दा उनको पेटको ३ ठाउँमा धारिलो हतियारका चोट देखिए । प्रहरीले उनलाई तत्काल उद्धार गरेर उपचारका लागि जिल्ला अस्पताल भोजपुर पुर्‍यायो । त्यहाँ उपचार सम्भव नहुने देखिएपछि उनलाई धरानस्थित बीपी कोइराला स्वास्थ्य विज्ञान प्रतिष्ठान रेफर गरिएको छ । 
जिल्ला प्रहरी कार्यालयका अनुसार उनको स्वास्थ्य अवस्था गम्भीर छ । 

घाइते फेला परेका व्यक्तिले प्रहरीलाई जे बताए...
प्रहरीले घाइते अवस्थामा फेला पारेका व्यक्ति हुन्, राजेन्द्र राई । उमेरले ३० पुगेका उनको घर भोजपुर नगरपालिका–२ हेलाउँछ हो । राजेन्द्रले आफूले हत्या गरिएको भनिएका रामप्रसाद राई गाउँपालिका–२, घोद्लेखानी बोन्थिताङका ४ जना उनकै ससुराली हुन् । 
घटनास्थलमा प्रहरीले उनका ससुरा ६८ वर्षीय बेलबहादुर गिरी, सासु ४५ बर्सिया मञ्जु गिरी, श्रीमती १६ बर्सिया मनीषा गिरी र १० वर्षीय सालो सपन गिरीको शव फेला पारेको थियो।

अस्पताल लैजाने क्रममा राजेन्द्रले आफूमाथि ससुरालीबाट मध्यरातमा ज्यान मार्ने उद्देश्यले आक्रमण गरेका कारण प्रतिवाद गर्ने क्रममा उनीहरूको मृत्यु भएको बताएका छन् । ‘ममाथि मध्यरातमा ससुरालीले छुरा देखाएर आक्रमण गरेपछि मैले त्यही छुरा खोसेर उनीहरूलाई मारेको हुँ ।’, राईले प्रहरीलाई भनेका छन् । 

त्यस्तै उनले आफ्नी श्रीमतीलाई घर लिएर जाने विषयमा विवाद हुँदा घटना भएको समेत प्रहरीलाई बताएका छन् । 
राजेन्द्रको अवस्था गम्भीर रहेका कारण उनीसँग औपचारिक रूपमा बयान लिने काम भएको छैन । उनले उद्धारका क्रममा सो घटना आफूले गरेको स्वीकार गरेको जिल्ला प्रहरी कार्यालय भोजपुरका प्रहरी निरीक्षक दीपक श्रेष्ठले जानकारी दिए । 

श्रीमती लिन पुगेका राजेन्द्रले किन सिध्याए ससुराली ?
उमेरले ३० पुगेका राईले धोद्लेखानीकी १५ बर्सिया मनीषालाई मन पराएका थिए । सोहीअनुरूप उनले मनीषासँग विवाह गर्न परिवारमा प्रस्ताव पुराएका थिए । तर मनिषाका परिवारले उनको प्रस्ताव स्वीकार गरेनन् । 
त्यसपश्चात् उनले गत असोजमा मनीषालाई भगाएर भोजपुर नगरपालिका–२ हेलाउँछस्थित आफ्नो घर पुराएका थिए । 

९ महिनाअघि घर पुराएका उनी र मनीषाबिच बेलाबखत झगडा हुने गर्थ्यो । सोही कारण उनी मनीषालाई छोडेर सदरमुकाम बस्ने र ज्याला मजदुरी गर्ने गरेको पाइएको प्रहरीले जनाएको छ । 
सोही क्रममा मनीषा करिब १ महिनाअघि घर फर्किएकी थिइन् । छोरीकै अनिच्छाका कारण मनिषाका परिवारले उनलाई राजेन्द्रको घर नपठाउने अडान कसेका थिए । 

मनीषा घर फर्किएपछि उनलाई फर्काउन भन्दै राजेन्द्र करिब १० दिनअघि मनीषाको घर पुगेका थिए । 
मनिषाका बाबुको भनाई उद्धृत गर्दै स्थानीयले बताएअनुसार राजेन्द्रले कि आफू मनीषालाई लिएर जाने कि परिवारै सिद्ध्याएर जाने भन्दै ससुराली पुगेका थिए । ‘उनले कि मनीषालाई लिएर जान्छु, कि परिवारलाई नै सिद्ध्याएर जान्छु भनेर उतैबाट छुरा लिएर पुगेका रहेछन्।’, एक स्थानीयले बताए । 

लागु पदार्थ सेवन गर्ने राजेन्द्रले सो कुरा सुनाएको भन्दै बुढो भएका मनिषाका बाबु बेलबहादुर गिरीले उक्त कुरा छिमेकीलाई बताएका थिए । छिमेकीले सोबारे प्रहरीलाई जानकारी गराउन भनेका थिए । ‘हामीले छलफल गर्नुपर्छ, प्रहरीलाई जानकारी गराउनुस् भन्दा उहाँले गाउँमा इज्जत जाने डरले प्रहरीमा भन्नुभएको थिएन ।’, ती स्थानीयले सिधाकुरालाई बताए । 

ससुरालीमा लिएर आएको छुरा प्रयोग गरी मध्यरातमा राजेन्द्रले ४ जनाको हत्या गरेको प्रारम्भिक अनुसन्धानमा देखिएको स्थानीय जनप्रतिनिधि र प्रहरीले जनाएका छन् । ‘घटनाको प्रकृति हेर्दा छुरा प्रयोग गरेर बीभत्स हत्या गरेको देखिन्छ ।’, मुचुल्कामा सहभागी रामप्रसाद राई गाउँपालिका–२ की वडा सदस्य प्रभा राई तामाङले सिधाकुरालाई बताइन् । उक्त घटनाको जड जबरजस्ती र अन्तरजातीय विवाह देखिएको स्थानीयहरू बताउँछन् । 
शवको पोस्ट मार्टमका लागि जिल्ला अस्पताल भोजपुर पठाइएको प्रहरीले जनाएको छ ।