गए राति जाजरकोटलाई केन्द्र बनाएर गएको भूकम्पमा परी मृत्यु हुनेको संख्या ८० पुगेको छ । 

जिल्ला प्रहरी कार्यालय जाजरकोटका प्रहरी प्रमुख डीएसपी सन्तोश रोकाका अनुसार भुकम्पमा परी जाजरकोट र रुकुम गरी हालसम्म ८० जनाको मृत्यु साथै १ सय ५० बढी घाइते भएका छन् । जसमध्ये जाजरकोटमा मात्रै ४४ जनाको मृत्यु, ५५ जना घाइते भएका छन् । 

त्यस्तै रुकुममा ३६ जनाको मृत्यु भएको छ भने ८५ जना घाइते भएका छन् । 

भूकम्पले जाजरकाेटका भेरी, नलगाड, कुशे, बारेकोट र छेडागाडमा ठूलाे क्षती पुर्‍याएको छ । भूकम्पका कारण घरहरु भत्किएको जानकारी प्राप्त भए लगत्तै उद्धारका लागि कर्णाली प्रदेश र प्रहरी कार्यालयबाट ४० र २० गरी ६० जनाको उद्धार टोली परिचालन गरिएको छ । जिल्लाका सबै सुरक्षा अङ्गहरु परिचालन भएको जाजरकाेटका प्रमुख जिल्ला अधिकारी सुरेश सुनारले बताए ।  

जाजरकोटका प्रहरी नायव उपरीक्षक सन्तोष रोकाका अनुसार भूकम्पमा परी नलगाड नगरपालिकाको उपप्रमुख सरिता सिंहको पनि मृत्यु भएको छ । भूकम्पका कारण जाजरकाेटकाे विद्युत सेवा समेत अवरुद्ध भएको छ । सडक सञ्चालनमा पनि समस्या भएकाले घाइतेको उद्धार कठिन भइरहेको उनको भनाइ छ ।

 शुक्रबार राति ११ बजेर ४७ मिनेट जाँदा जाजरकोटलाई केन्द्रविन्दु बनाएर छ दशमलव चार म्याग्निच्युडको भूकम्प गएको हो ।