सबै कुरा

भूकम्पपीडितलाई बागमती प्रदेशको डेढ करोड र सुदूरपश्चिम प्रदेशको १ करोड सहयोग

सिधाकुरा

शनिबार, कात्तिक १८, २०८०

भूकम्पपीडितलाई बागमती प्रदेशको डेढ करोड र सुदूरपश्चिम प्रदेशको १ करोड सहयोग

बागमती प्रदेश सरकारले भूकम्पपीडितको तत्काल प्रभावकारी उद्धार, उपचार, राहत र पुनःस्थापनाका लागि एक करोड ५० लाख सहयोग उपलब्ध गराउने भएको छ ।

प्रदेशका आन्तरिक मामिला तथा कानुनमन्त्री गङ्गानारायण श्रेष्ठले आज विज्ञप्ति जारी गर्दै नागरिक समाज, विभिन्न गैरसरकारी संस्थालाई विपद्को घडीमा आवश्यक सहयोग गर्नसमेत आग्रह गरेका छन् ।

विज्ञप्तिमा भनिएको छ, “यस विपद्को घडीमा बागमती प्रदेश सरकार कर्णाली प्रदेश सरकारसँगै रहनेछ ।” जाजरकोटको रामीडाँडा केन्द्रबिन्दु भई गएराति गएको भूकम्पले ठूलो मात्रामा जाजरकोट र रुकुम पश्चिम जिल्लामा जनधनको क्षति पुगेकामा बागमती प्रदेश सरकारले दुःख व्यक्त गरेको छ ।

विज्ञप्तिमा भनिएको छ, “उक्त भूकम्पबाट ज्यान गुमाएका सम्पूर्ण व्यक्तिप्रति श्रद्धाञ्जली अर्पण गर्दै शोकाकुल परिवार र आफन्तजनमा समवेदनाका साथै घाइतेको शीघ्र स्वास्थ्य लाभको कामना गर्दछौँ ।”

त्यस्तै सुदूरपश्चिम प्रदेशले पनि १ करोड रुपैयाँ राहत उपलब्ध गरउने घोषणा गरेको छ । शनिबार बसेको मन्त्रीपरिषद्को बैठकले उक्त निर्णय गरेको हो । त्यस्तै सुदूरपश्चिम सरकारले २० जना स्वास्थ्यकर्मीको टोली पनि पठाउने निर्णय गरेको छ ।

प्रकाशित मिति: शनिबार, कात्तिक १८, २०८०

प्रतिक्रिया दिनुहोस्